Լուրերը, որ Ախթալայի լեռնարաստացման կոմբինատը դադարեցրել է աշխատանքը, այսօր հաստատվեցին:

Շամլուղի բաց հանքավայրում մակաբացման, հորատման և պայթեցումների աշխատանքները  արդեն 4 տարի է իրականացնում է «Ապառաժ» ՍՊԸ-ն: «Ապառաժը» Շամլուղի բաց հանքավայրում իր աշխատանքները դադարեցրել է սեպտեմբերի 12-ին: Աշխատանքները դադարեցնելու մասին տեղեկությունը մեր հեռախոսազրույցի ընթացքում հաստատեց նաեւ «Ապառաժ» ՍՊԸ-ի գործադիր տնօրեն Սասուն Ավետիսյանը:

«Այո, այս պահին Շամլուղի բաց հանքավայրում  մեր աշխատանքները դադարեցված են»,- ասաց գործադիր տնօրենը: Նա նաև  հաստատեց, որ Ախթալայի լեռնահարստացման կոմբինատի պարտքն «Ապառաժ» ՍՊԸ-ին այս պահին կազմում է 1,2 մլն դոլար: Սասուն Ավետիսյանը մեր մյուս հարցերին չպատասխանեց,  ասելով, որ գտնվում է հիվանդանոցում եւ խնդրեց մեր զրույցը տեղափոխել վաղը:

Այսօր երեկոյան Ախթալայի քաղաքապետ Հայկազ Խաչիկյանը հաստատեց, որ արդեն մեկ շաբաթ է` Ախթալայի լեռնահարստացման կոմբինատի Շամլուղի բաց հանքավայրում դադարեցվել  են մակաբացման, պայթեցումների եւ հորատման աշխատանքները:

«Երեք օր է` չի աշխատում նաև  Ախթալայի լեռնահարստացման կոմբինատը»,- ասաց քաղաքապետ Խաչիկյանը: «Ախթալայի ԼՀԿ» ՓԲԸ-ում ստեղծված վիճակի մասին վաղը անձամբ կտեղեկացնեմ  Լոռու մարզպետին»,- ասաց Ախթալայի քաղաքապետը : 

Ակնհայտ է, որ «Ախթալայի ԼՀԿ» ՓԲԸ-ի սեփականատեր «Մեթըլ Փրինս ԷԼ-ԹԻ-Դի»-ից պարտքերը ստանալու «Ապառաժ» ՍՊԸ-ի հույը սպառվել է, որի պատճառով էլ ընկերությունը  դիմել է ծայրահեղ քայլի:

Ախթալայի ԼՀԿ-ի վրա սև ամպեր են կուտակվում: Իսկ ի՞նչ է սպասվում ԼՀԿ-ի 600 աշխատողներին: