Քիչ առաջ Արմավիրի մարզի ընդհանուր իրավասության դատարանի Էջմիածնի նստավայրում դատավոր Վահե Խալաթյանի նախագահությամբ սկսվեց Արամ Մուղալյանի և նրա ընկերների դատաքննությունը: Դատավորն անդրադարձավ կալանքը անձնական երաշխավորությամբ փոխարինելու վերաբերյալ Արամ Մուղալյանի պաշտպանների միջնոդությանը և առանց հիմնավոր պատճառաբանությունների մերժեց այն:

Կալանքը ազատազրկման հետ չկապված այլ խափանման միջոցով փոխարինելու միջնորդությամբ հանդես եկավ նաև ամբաստանյալներից Ռոբերտ Փիլոյանի պաշտպանը` նշելով, որ ՔԿՀ-ում իր պաշտպանյալի առողջական վիճակը կտրուկ վատացել է, բողոքում է սրտի շրջանում զգացվող ցավերից: Ըստ պաշտպան Էդուարդ Աղաջանյանի՝ Ռոբերտը ցավերի պատճառով դժվարությամբ է վեր կենում անկողնուց: Երբ պաշտպանը ընթերցում էր միջնորդությունը, Ռոբերտի մայրը` Մարինա Հակոբյանը, նիստերի դահլիճում սկսեց գոռգոռալ` ասելով, որ «մեղադրական կողմը ցանկանում է իր տղայի գլուխն ուտել. «Ես թույլ չեմ տա, որ իմ տղայի գլուխն ուտեք. բոլորդ պատասխան եք տալու»: Ըստ Մարինա Հակոբյանի` որդու արյան ճնշումը հասնում է մինչև 240-ի:

Դատարանը ընդմիջեց նիստը և հեռացավ խորհրդակցական սենյակ` որոշում կայացնելու: Որոշումը կհրապարակվի 15:30-ին: