Գյումրի-Երեւան գնացքի ուղեւորափոխադրման նոր ժամանակացույց
Արսեն Վարդանյան
2014թ-ի հունվարի 1-ից Գյումրի-Երեւան-Գյումրի գնացքը օրական նախկին երկուսի փոխարեն կսպասարկի երեք անգամ: Այս մասին «Հետք»-ին փոխանցեց Գյումրի կայարանի մեկնակայանի պետ Մուրադ Ալեքսանյանը: Գնացքն այսուհետ Գյումրիից Երեւան կուղեւորվի ժամը ամեն օր՝ 8:35-ին, 11:45-ին եւ 18:10-ին, իսկ Երեւանից՝ 8:00-ին, 14:20-ին եւ 18:10-ին:
Մուրադ Ալեքսանյանի խոսքով՝ մարդատար գնացքները Հայաստանում եւ աշխարհում աշխատում են գրեթե 0 տոկոս շահույթով: Բոլոր երկրներում էլ այն դժվարությամբ է շահույթ բերում եւ ծախսերը փակվում են բեռնափոխադրումների հաշվին: Գյումրի-Երեւան գնացքը ներկայումս 4 վագոնով է աշխատում, կարող է սպասարկել 400 ուղեւորի, սակայն լինում են օրեր, որ 100 հոգին չի գերազանցում: Տոմսի արժեքը՝ 1000 դրամ է:
«Փորձել ենք երրորդ գնացք ավելացնելով ապահովվել ձմեռային ամիսներին ուղեւորների անվտանգ ու ապահով տեղաշարժը: Վերջին մեկ տարվա ընթացքում ապրիլ-մայիս ամիսներին գործեց Գյումրի-Վանաձոր գնացքը, բայց օր ունեինք, որ 4 ուղեւոր ենք սպասարկել, այդ իսկ պատճառով անարդյունավետ էր այս երթուղով գնացք ճանապարհելը»,-ասում է Գյումրի կայարանի մեկնակայանի պետը:
Գյումրեցի Կարեն Ռաֆայելյանն արդեն մի քանի տարի է՝ Երեւան մեկնելուց օգտվում է գնացքից եւ բավականին գոհ է այս փոխադրամիջոցից՝ թեպետ գնացքը մի փոքր ավելի ուշ է հասնում գազելից կամ տաքսիներից:
«Ժամանակային առումով՝ գիտես, թե որ ժամին պետք է շարժվես եւ որ ժամին տեղ հասնես: Տաք է ու հարմարավետ, այն իմաստով որ տեղաշարժի, կանգնելու, նստելու, պառկելու հնարավորություն ունես: 0-ի հասնող շփում սպասարկողի հետ, որը շատ կարևոր է: Ավելի էժան է, քան մյուս փոխադրամիջոցները: Ժամանակը լավ է անցնում, շփումներ տարբեր մարդկանց հետ, թղթախաղ, բլոտ, կամ ասենք համակարգչով զբաղվել ու, վերջիվերջո, հանգիստ քուն: Միայն թե միշտ ասում ու գովազդում են, որ Wi-Fi կա, բայց սուտ է»,- նկատեց Կարեն Ռաֆայելյանը:
Նա խոսեց նաեւ երեկոյան ուշ ժամին Գյումրի հասնող ուղեւորների դժվարությունների մասին: Ժամը 21:00-ին կայարանամերձ այդ հատվածն սպասարկող երթուղայինները չեն աշխատում: «Լավ կլիներ, որ մեկական գազել աշխատեր հատուկ գնացքի ժամանման ժամին, որ ստիպված չլինենք օգտվել տաքսի ծառայությունից»,- հավելեց Կարենը:
Մեկնաբանություններ (3)
Մեկնաբանել