«Չոսուն» կայքը հոդված է հրապարակել, որը վերնագրված է «Հայաստանի նախագահը՝ առողջապահական տուրիստ Կորեայում»: Հայաստանյան մամուլի հրապարակումների համաձայն՝ նախագահին ուղեկցել են ԼՂՀ նախկին նախագահ Արկադի Ղուկասյանը և Ռուսաստանի հայերի միության նախագահ Արա Աբրահամյանը (որը երևում է կայքի հրապարակած լուսանկարում): Հոդվածը, Civilnet.am-ի թարգմանությամբ, ներկայացնում ենք ստորև:

Կորեայի ծաղկող բժշկական զբոսաշրջությունը առաջին անգամ գրավել է օտարերկրյա պետության ղեկավարի. վերջերս վերականգնողական բուժումներ է ստացել Հայաստանի նախագահը:

Հունվարի 9-ին ոստիկանական մեքենաների ուղեկցությամբ Հայաստանի նախագահի սև սեդանների ավտոշարասյունը նրան բերեց Գանգնամի Չաում բժշկական կենտրոն: Չաումը վերականգնողական կլինիկա է, որը տնօրինում է CHA Health Systems ընկերությունը։

Սարգսյանին ուղեկցողների թվում էին խորհրդային նախկին արբանյակային երկրի նախկին նախագահ և Ռուսաստանից մի մեծահարուստ: Վերջինը նաև Ռուսաստանի նախագահի՝ անցյալ տարի Կորեա կատարած պետական այցի ժամանակ նրա պատվիրակության կազմում էր և այդ ժամանակ նույն կլինիկայում բուժումներ էր անցել։

Մեկշաբաթյա այցի ընթացքում այս խումբը Չաում կենտրոն է այցելել ամեն օր և բուժումներ ստացել, այդ թվում ցողունային բջիջների թերապիա, սպա և երիտասարդացման պրոցեդուրաներ, մարմնի հարթեցում և մերսում և քաշի վերահսկման պրոցեդուրաներ:

Կլինիկայի աշխատակիցները նշում են, որ Սարգսյանին նրա մնալու ընթացքում ուղեկցում էին ոստիկանությունը և Ազգային հետախուզական ծառայությունը: Խումբն ընդհանուր առմամբ վճարել է 200 միլիոն կորեական վոն (մոտ 186 000 դոլար) և հեռացել է հունվարի 17-ին:

2010-ին բացվելուց ի վեր՝ Չաում կլինիկայում բազմաթիվ հարուստ մարդիկ են բուժում ստացել աշխարհի տարբեր մասերից, որոնք Սեուլ են ժամանում իրենց մասնավոր օդանավերով: Նրանց թվում են եղել չինացի և կանադացի մեծահարուստ գործարարներ, Ղազախստանի վարչապետը և սաուդյան ու Արաբական Էմիրությունների արքայական ընտանիքի անդամներ:

Բուժում ստացողների թվում է եղել նաև Կորեայի ֆուտբոլի ազգային հավաքականի նախկին մարզիչ Գուս Հիդինկը: