Վաղվանից «Թիանեպտին» («Կոաքսիլ»), «Տրոպիկամիդ», «Պրեգաբալին» («Լիրիկա») և «Սեդալգին» դեղերը դեղատներում վաճառվելու են միայն բժշկական կազմակերպություններից դուրս գրված հոգեմետ դեղատոմսերով: Այս դեղերի շրջանառության նկատմամբ նաև կիրառվելու են բոլոր սահմանափակումները, որոնք նախատեսված են «Հայաստանի Հանրապետության հսկման ենթակա թմրամիջոցների, հոգեմետ նյութերի և դրանց պրեկուրսորների N3 ցուցակում» ընդգրկված դեղերի համար:

2010թ. դեկտեմբերի 9-ի ՀՀ կառավարության որոշմամբ լրացումներ են կատարվել կառավարության 2003 թ. օգոստոսի 21-ի որոշմամբ հաստատված «Հայաստանի Հանրապետության հսկման ենթակա թմրամիջոցների, հոգեմետ նյութերի և դրանց պրեկուրսորների N3 ցուցակում»: Վերոհիշյալ ցանկում ընդգրկվել են «Թիանեպտին», «Տրոպիկամիդ», «Պրեգաբալին» և «Սեդալգին»` պարացետամոլ, մետամիզոլ (մետամիզոլի նատրիումական աղ), կոֆեին, ֆենոբարբիտալ, կոդեին  ֆոսֆատ» դեղերը:

Որոշումը պաշտոնապես հրապարակվել է 2010թ. դեկտեմբերի 22-ին և ուժի մեջ է մտնում պաշտոնական հրապարակման օրվան հաջորդող 30-րդ օրը` 2011թ. հունվարի 21-ին: Հայաստանի դեղատներում վերջերս «Թիանեպտին» («Կոաքսիլ»), «Տրոպիկամիդ», «Սեդալգին» և «Պրեգաբալին» («Լիրիկա») դեղերի վաճառքի աճ էր արձանագրվել: ՀՀ առողջապահության նախարարության կատարած դիտարկումների արդյունքում պարզվել է, որ նշված դեղերն այլ դեղերի և/կամ նյութերի համադրմամբ կարող են օգտագործվել որպես հոգեմետ նյութեր:

Ստացված պատրաստուկների գործածումն արագ առաջացնում է և ֆիզիկական, և հոգեկան կախվածություն, ինչպես նաև վարքային տարբեր խանգարումներ, իսկ գերդոզավորումը բերում է մահվան: Հաշվի առնելով խնդրի հասարակական հնչեղությունն ու վտանգավորությունը մարդկանց առողջության համար` ՀՀ վարչապետի հանձնարարությամբ առողջապահության նախարարությունը շահագրգիռ այլ գերատեսչությունների հետ համատեղ միջոցառումներ էր իրականացրել նշված դեղերի ազատ վաճառքը սահմանափակելու ուղղությամբ: