«Հետքը» նամակ է ստացել Երևանի Ճարտարապետության և շինարարության պետական համալսարանի ընդունելության քննության մասնակից դիմորդներից, որն ամբողջությամբ ներկայացնում ենք ստորև.

«Երևանի Ճարտարապետության և շինարարության պետական համալսարանի ընդունելության քննությունն անցկացնելու կարգը խախտվել է, և ոտնահարվել են դիմորդների իրավունքները, որոնք սույն թվականի հունիսի 29-ին հանձնել են քննություն «Գծագրություն» առարկայից: Վերոնշյալ խախտումների վերաբերյալ փաստարկները հինգն են: 

1. Քննասենյակներում պետք է տեղադրված լինեին տեսախցիկներ, որոնք բացակայում էին:
2. Ըստ կարգի՝ դիմորդը մոտենում և վերցնում է քննական տոմս, սակայն քննական տոմսերը բաժանվել են հանձնաժողովի անդամի կողմից առձեռն, ով կազմել էր տոմսերը: Վերջինս նաև դիմորդների հետ էր պարապել և իրավունք չուներ լինելու հանձնժողովի անդամ:
3. Դիմորդին պետք է տրամադրվեր հանձնած գծագրի պատճեն, որը չի տրամադրվել, ինչն էլ վկայում է ստուգող հանձնաժողովի կողմից աշխատանքներում փոփոխություններ կատարելու հնարավորությունը:
4. Դիմորդի անունը և ազգանունը պետք է գրվեին գծագրի`այսինքն դիմորդի տվյալ աշխատանքի վրա, սակայն գրվել է հավելյալ թերթիկի վրա և ամրացվել գծագրին: Սա ևս հնարավորություն է տալիս փոփոխելու աշխատանքները:
5. 2014թ. հրատարակված գծագրության ուղեցույցը, որը հիմք էր հանդիսանում դիմորդներին՝ պատրաստվելու քննությանը, չի պարունակել նմանատիպ առաջադրանքի որևէ նմուշ դիզայն բաժնի համար նախատեսված խնդիրների ցանկում:

Ելնելով վերոնշյալից՝ մենք `դիմորդներս, պահանջում ենք ՀՀ կրթության և գիտության նախարարից ուսումնասիրել այս փաստերն ու կազմել նոր հանձնաժողով՝ նոր քննության անցկացման համար»:

Եղիազարյան Էլենա Կարենի

Հունանյան Լիանա Անդրանիկի

Միքաելյան Աննա Արմենակի

Սարգսյան  Անի Աշոտի

Առաքելյան Էդգար Ղազարոսի