Սիսիանի քաղաքապետի ու նրա աշխատակազմի երկու աշխատակիցների,  «Սիսիանի լրատու» ՍՊԸ տնօրեն Արմեն Հովակիմյանի եւ ընկերության ֆինանսական պատասխանատուի գործով երեկ նշանակված քրեական գործի քննությունը կրկին հետաձգվեց: Գործով անցնող ամբաստանյալներից ոչ բոլորն էին ներկայացել Սյունիքի մարզի ընդհանուր իրավասության դատարանի Կապանի նստավայրում ընթացող դատաքննությանը:

Ամբաստանյալի կարգավիճակում գտնվող Սիսիանի քաղաքապետ Աղասի Հակոբջանյանը եւ աշխատակազմի ֆինանսա-տնտեսական բաժնի պետ Կ. Դանիելյանը, որոնց մեղադրանք է առաջադրվել պաշտոնեական անփութության համար, չէին ներկայացել դատական նիստին: Բացակայում էին նաեւ քաղաքապետի նախկին տեղակալ Աշոտ Գրիգորյանի (մեղադրվում է պաշտոնեական  լիազորությունները չարաշահելու համար) եւ «Սիսիանի լրատու» ՍՊԸ-ի տնօրեն Արմեն Հովակիմյանի փաստաբանները:

Դատական նիստին չներկայանալու մասին գրավոր նամակ էր ներկայացրել Աղասի Հակոբջանյանը, իսկ Կ. Դանիելյանն իր բացակայության մասին տեղեկացրել էր հեռախոսազանգով, որը դատավորը համարեց ոչ պաշտոնական իրազեկում: Դատավոր Օհանյանը ամբաստանյալների եւ պաշտպանների բացակայությունը գնահատեց  անհարգալից  վերաբերմունք դատարանի նկատմամբ:

Մեղադրող կողմի առաջարկով դատարանը ամբաստանյալներին բերման ենթարկելու մասին որոշում կայացրեց: Դատական նիստը հետաձգվեց մինչեւ նոյեմբերի 17-ը:

Հիշեցնենք, որ նշված գործի դատական նիստը հետաձգվել էր նաեւ նախորդ անգամ` հոկտեմբերի 17-ին: 

«Հետքն» առաջիկայում կներկայացնի այս քրեական գործի վերաբերյալ այլ իրավաբանների տեսակետը:

Լուսանկարում՝ Արմեն Հովակիմյանն ու Աղասի Հակոբջանյանը