Տեսանյութեր
Լուսանկարներ
Գյումրիում բացվեց ցեղասպանության զոհերի հիշատակին նվիրված հուշակոթող
Գյումրու Բագրատունյաց այգում այսօր բացվեց քանդակագործ Ֆրիդ Սողոյանի հեղինակած «Վերածնունդ» հուշակոթողը՝ նվիրված 100 տարի առաջ Օսմանյան Թուրքիայում ցեղասպանության զոհ դարձած հայերի հիշատակին: Քանդակագործը սեփական ստեղծագործությունը հրաժարվեց մեկնաբանել՝ նշելով միայն, որ տուֆից կերտված ձեռքերի մեջ պահվող խաչը հայի չմարող հույսն է: «Ես կարծում եմ, որ դրանով արդեն ամեն ինչ ասված է, նաեւ անունը՝ «Վերածնունդ»»,-նշեց Ֆրիդ Սողոյանը: Մոսկվաբնակ Արթուր Անտոնյանը, ում առաջարկով ու աջակցությամբ էր կյանքի կոչվել հուշակոթողը, ասաց, որ Գյումրին եւս վերածնվելու հույսեր է ներշնչում:
«Երբ քաղաքապետ Սամվել Բալասանյանին ասացի, որ ուզում եմ նման հուշարձան կանգնեցնել մեր քաղաքում, իմ առաջարկն անմիջապես ընդունեցին ու օգնեցին համապատասխան տարածք գտնելու: Ինձ համար պարոն Սողոյանի կերտած այս հուշարձանը նշանակում է սփյուռք, հայրենիք, հավատք: Ես նայում եմ այս կոթողին ու հասկանում, որ առանց մեր արմատների մենք հեռու չենք գնա: Ես շնորհակալ եմ քանդակագործին իմ մտքերը, գաղափարները ճիշտ վերարտադրելու համար»,-նշեց Արթուր Անտոնյանը:
Մեկնաբանություններ (2)
Մեկնաբանել