HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Ադրբեջանամետ դիրքորոշմամբ հայտնի ԵԽԽՎ նախագահը հրաժարվել է անցկացնել ավանդական մամուլի ասուլիսը

2016թ. հունվարին ընտրված ԵԽԽՎ նախագահ, իսպանացի խորհրդարանական Պեդրո Ագրամունտը հրաժարվել է այսօր մեկնարկող ԵԽԽՎ գարնանային նստաշրջանից առաջ մամուլի ասուլիս անցկացնել: Նկատենք, որ մամուլի ասուլիսներն ավանդաբար անցկացվում են նիստից առաջ, որի ընթացքում ԵԽԽՎ նախագահը լրագրողներին ներկայացնում է նիստի օրակարգի առանցքային թեմաները: Այս նիստի օրակարգ երեք դիմում է ներկայացվել ղարաբաղյան հակամարտության վերաբերյալ քննարկումներ անցկացնելու մասին՝ Ֆրանսիայից, Հայաստանից եւ Ադրբեջանից. «ԼՂ հակամարտության, բռնությունների վերջին եւ ողբերգական սրումը», «Ադրբեջանի իրականացրած ռազմական հանցագործությունները ԼՂ-ի դեմ վերջին ագրեսիայի ժամանակ», «Բռնությունների ողբերգական էսկալացիան Լեռնային Ղարաբաղում եւ Ադրբեջանի մյուս գրավված տարածքներում»:

Ինչպես տեղեկացրին ԵԽԽՎ լրատվական ծառայությունից, սա ոչ սովորական իրավիճակ է, եւ առաջին անգամ է ԵԽԽՎ նախագահը հրաժարվում մամուլի ասուլիս տալ:

Նախկինում ԵԽԽՎ բյուրոյում Ղարաբաղի հարցով հատուկ կոմիտեի նախագահի պաշտոնը զբաղեցնող Պեդրո Ագրամունտը ԵԽԽՎ նախագահի պաշտոնում էլ չկարողացավ հավասարակշիռ դիրքորոշում պահպանել: Այսպես՝ կրակի դադարեցման մասին ապրիլի 3-ի նրա հայտարարության մեջ՝ ուղղված հակամարտող կողմերին, կոչ է հնչեցվում «դուրս բերել հայկական զորքերը ադրբեջանական գրավվյալ տարածքներից՝ ՄԱԿ-ի ԱԽ բանաձեւերին համապատասխան»: Նման «կողմնապահ» մոտեցումից վրդովվել է հայկական պատվիրակությունը, որը նստաշրջանից առաջ ԵԽԽՎ նախագահի աշխատանքը բոյկոտելու մտադրություն է հայտնել:

Արդյոք հայ լրագրողների հարցերից խուսափելը բավարար առի՞թ էր մամուլի ասուլիսը չեղյալ հայտարարելու համար՝ կպարզվի նստաշրջանի ընթացքից: Նշենք, որ վաղը՝ ապրիլի 19-ին, ԵԽԽՎ նստաշրջանին հատուկ հյուրի կարգավիճակով հրավիրվել է Թուրքիայի վարչապետ Ահմեդ Դավութօղլին:

Օկսանա Մուսայելյան

Ստրասբուրգ

Մեկնաբանություններ (1)

Hasmik
Ծախված իսպանացին պարզապես կանխատեսելով, թե ինչպիսի խայտառակ իրավիճակում կարող է հայտնվել ասուլիսում հնարավոր հնչեցվելիք հարցերի արդյունքում, որոշել է ընտրել չարյաց փոքրագույնը, հրաժարվել ասուլիսից։

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter