Տնտեսական մրցակցության պաշտպանության պետական հանձնաժողովը պարզաբանել է այսօր «Հետքում» հրապարակված «Ինչպես առողջացնել տնտեսական մրցակցության միջավայրը. մասնագետներից՝ ՏՄՊՊՀ- ին» հոդվածը: Այն ներկայացնում ենք ստորև.  

«Ձեր կողմից հրապարակված «Ինչպես առողջացնել տնտեսական մրցակցության միջավայրը. մասնագետներից՝ ՏՄՊՊՀ- ին» հոդվածում նշել եք, որ  ՀՀ ՏՄՊՊՀ ներկայացուցիչները չեն մասնակցել «ՀՀ Տնտեսական մրցակցության պաշտպանության օրենսդրության և իրավակիրառ պրակտիկայի հայեցակարգային և սահմանադրաիրավական վերլուծություն» թեմայով  քննարկմանը։

Թե ինչու՝ նշեմ հետևյալը.

«Հանձնաժողովը տնտեսվարողների նախաձեռնությամբ և  ֆինանսավորմամբ կազմակերպվող  միջոցառումներին որպես կանոն չի մասնակցում: Այս դեպքում՝ առավել ևս, քանի որ  խոսքը վերաբերվում է«Հայկական ծրագրեր» ՍՊ ընկերությանը, որի գործը՝  մրցակցային օրենսդրության խախտման փաստերի առնչությամբ  այս պահին   գտնվում է  Հանձնաժողովի վարույթում: Միջոցառմանը մասնակցելու հրավերն էլ ստացել ենք Հանձնաժողովում ընկերության շահերը պաշտպանող փաստաբանական գրասենյակի կողմից: Հանձնաժողովը բազմակի անգամ ավելի լավ է տիրապետում մրցակցության պաշտպանության ոլորտում առկա իրավիճակին, խնդիրներին և դրանց լուծման մեխանիզմներին, քան, կարող են բացահայտել ինչպես Դուք եք իրավացիորեն նշում Ձեր հոդվածում՝  «Հայկական Ծրագրեր» ՍՊ ընկերության պատվերով կատարված ուսումնասիրությունները»»,- ասվում է պարզաբանման մեջ: