Ոստիկանությունը հաղորդագրություն է տարածել այն մասին, որ «Սասնա ծռեր» զինված խումբը պատանդ է վերցրել բժիշկների:

«Այս գիշեր հաղորդվել էր, որ, ըստ զինված խմբի, ՊՊԾ գնդի տարածքում կա ևս երկու վիրավոր: Իրավապահները նրանց բուժօգնություն տրամադրելու կոչ էին արել և մերժում ստացել: Վիրավորներին բուժհաստատություն տեղափոխելու կոչ էին արել նաև հարազատները։ Իրավապահներն ապահովել էին բոլոր անհրաժեշտ պայմանները։ Իսկ երբ բժիշկները ժամանել են, նրանց պատանդ են վերցրել: 
Իրավապահները միջոցներ են ձեռնարկում պատանդված բժիշկներին բանակցությունների միջոցով ազատելու համար»,-ասվում է ոստիկանության հաղորդագրության մեջ:

Իր հերթին հաղորդագրություն է տարածել Առողջապահության նախարարությունը, հայտնելով, որ պատանդներն են «Շտապօգնություն» ՓԲԸ բուժաշխատողներ  Նորայր Թևանյանը եւ Սալվադոր Խեչոյանը, բուժակ Դավիթ Տոնոյանը, բուժքույր Մալինա Մարգարյանը:

Բժշկական հանրությունը դատապարտել է մարդասիրական առաքելություն իրականացնող մասնագետներին պատանդ վերցնելը:

«Տեղեկությունը մեծ վրդովմունքով ընդունած Հայաստանի բժշկական ամբողջ հանրությունը խստորեն դատապարտում է անբարո այս քայլը և պահանջում շտապ ազատ արձակել պատանդառության մեջ գտնվող բուժաշխատողներին` առանց որևէ նախապայմանի: Անգամ հաշվի չի առնվել այն հանգամանքը, որ դեպքերի սկզբից մինչ օրս այս բժիշկները անհրաժեշտ բուժօգնություն են ցուցաբերում նաև զինյալ խմբի անդամներին»,-նշվում է հաղորդագրության մեջ: