Հանրային ռադիոն եւ Հանրային հեռուստատեսությունը, ինչպես նաեւ առաջիկա խորհրդարանական ընտրությունների նախընտրական փուլում կուսակցություններին եւ կուսակցությունների դաշինքներին եթերաժամ տրամադրող հեռուստատեսային եւ ռադիոընկերությունները սահմանել են քաղաքական եթերի սակագները:

Հեռուստատեսության եւ ռադիոյի ազգային հանձնաժողովի հրապարակած տեղեկանքի համաձայն՝ քարոզարշավի ընթացքում քաղաքական գովազդ պատրաստ են եթեր հեռարձակել 28 հանրապետական եւ մարզային հեռուստաընկերություններ, ինչպես նաեւ` 8 ռադիոընկերություններ:

«Շանթ» եւ «Արմենիա» հեռուստաընկերությունները սահմանել են հավասարաչափ՝ 100 հազար դրամ/րոպե սակագինը, որն ամենաբարձրն է: «Արմենիա»-ն կուսակցություններին եւ դաշինքներին պատրաստ է մեկ օրվա ընթացքում հատկացնել 6 րոպե վճարովի եթերաժամանակ, իսկ «Շանթը» որեւէ սահմանափակում չի նշել:

Հանրային հեռուստաընկերության եւ Հ2-ի եթերում սեփական ծրագրերը ներկայացնելու ամեն 1 րոպեի համար քաղաքական ուժերը կվճարեն 60 հազար դրամ:

Հ3-ը սահմանել է 50 հազար, «Ա-Թիվի»-ն՝ 40 հազար, «Երկիր մեդիան»՝ 25 հազար, «Ար» եւ «Արմնյուզ» հեռուստաընկերությունները՝ 20 հազար, «Կենտրոնը»՝ 18 հազար դրամ՝ յուրաքանչյուր րոպեի համար:

Մարզային հեռուստաընկերություններից ամենաբարձր սակագինը՝ 22 հազար դրամ, սահմանել է «Շանթ»-Գյումրին, իսկ ամենացածր սակագինը՝ 1000-ից մինչեւ 1900 դրամ, կախված ժամից, Ալավերդու «Անկյուն+3»-ը:

Ընդհանրապես, ամենացածր սակագինը «Ռադիո Շիրակ»-ի սահմանածն է՝ 600 դրամ/րոպե, առանց ավելացված արժեքի հարկի: Հայաստանի հանրային ռադիոընկերությունը սահմանել է 2000 դրամ, «Ռադիո Մարշալ» ռադիոծրագիրը՝ 2500 դրամ, «Վան» ռադիոկայանը՝ 3000, «Հայ FM»-ը եւ «Ռադիո Հայ»-ը՝ 18000  (ներ. ԱԱՀ), «Շանթ» ռադիոն՝ 1500, «Միգ-FM»-ը՝ 3000 դրամ (ներառյալ ԱԱՀ-ն)՝ 1 րոպեի համար:

Նշենք, որ քաղաքական գովազդի սակագները սահմանվում են ոչ թե կամայական, այլ՝ ՀՀ Ընտրական օրենսգրքի համաձայն: Ըստ օրենսգրքի 19-րդ հոդվածի 4-րդ կետի՝ Ազգային ժողովի եւ Երևանի ավագանու ընտրությունների նշանակումից ոչ ուշ, քան 10 օր հետո Հեռուստատեսության և ռադիոյի ազգային հանձնաժողովը հրապարակում է Հանրային ռադիոյի եւ Հանրային հեռուստատեսության վճարովի եթերաժամի մեկ րոպեի գինը, որը չի կարող գերազանցել ընտրությունների նշանակմանը նախորդող վերջին 6 ամսվա համար առեւտրային գովազդի ձեւավորված շուկայական արժեքը եւ մինչեւ նախընտրական քարոզչության ավարտը չի կարող փոփոխվել:

Նույն դրույթները հավասարապես տարածվում են նաեւ թեկնածուներին, ընտրություններին մասնակցող կուսակցություններին նախընտրական քարոզչություն իրականացնելու համար եթերաժամ տրամադրող վերգետնյա եթերային հեռարձակում իրականացնող մյուս ռադիոընկերությունների եւ հեռուստաընկերությունների վրա` անկախ սեփականության ձեւից: