Էդմոն Մարուքյան. «Որևէ մեկի մանդատն ավելի կարմիր չէ, քան մյուսներինը»
Ազգային ժողովում պատգամավորության 5 տարիների ընթացքում «ԵԼՔ» խմբակցության կողմից ԱԺ նախագահ առաջադրված Էդմոն Մարուքյանը նկատել է, թե ինչպես շատ հարցերում ԱԺ նախագահը տարբերություն է դրել իր կուսակցական պատգամավորների ու մյուսների միջև՝ նախապատվություն տալով ՀՀԿ-ական գործընկերներին ու այդպիսով անհավասար պայմաններ ստեղծելով նրանց համար:
Այսօր կայացած նորընտիր խորհրդարանի անդրանիկ նիստի ժամանակ Մարուքյանը խոստացավ, որ ԱԺ նախագահ դառնալու դեպքում ինքն այդպիսին չի լինի:
«Ես կլինեմ բոլոր պատգամավորների ԱԺ նախագահը...որևէ մեկի մանդատն ավելի կարմիր չէ, քան մյուսներինը»,- այսօր Ազգային ժողովում նախագահի թեկնածուի իր ելույթում ասաց Էդմոն Մարուքյանը:
«Նախորդ տարիներին մենք ունեցել ենք արտոնյալ կարգավիճակ ունեցող գերատեսչությունների ղեկավարներ, որոնք երբեք ԱԺ շենք չեն մտել»,- ասաց Մարուքյանն ու խոստացավ, որ իր նախագահության ընթացքում չի լինի որևէ գերատեսչության կամ նախարարության ղեկավար, որը չի բարեհաճի ներկա լինել ԱԺ մշտական հանձնաժողովների նիստերին, լսումներին ու քննարկումներին:
Մարուքյանը հայտնեց նաև, որ ԱԺ նախագահ լինելու դեպքում ինքն անհանդուրժողական է լինելու էթիկայի կանոնների խախտումների նկատմամբ և խոսեց ուրիշի փոխարեն քվեարկությունների հարցի մասին:
«Երբ մի պատգամավորի փոխարեն մեկ ուրիշն է քվեարկում, ստացվում է, որ զավթվում է այն իշխանությունը, որը տվյալ պատգամավորը ստացել է ժողովրդից»,- ասաց Էդմոն Մարուքյանը:
«Չեմ արդարացնելու, չեմ խրախուսելու որևէ պատգամավորի կողմից էթիկայի կանոնների խախտումը, բոլորը պետք է պատասխան տան իրենց արածի համար»,- ասաց ԱԺ նախագահի թեկնածուն:
Մարուքյանը նշեց, որ ԱԺ հինգերորդ գումարման նստաշրջանում ինքը բազմաթիվ օրենքի նախագծեր է ներկայացրել, որոնք այդպես էլ չեն հասել ԱԺ դահլիճ ու չեն դարձել քննարկման առարկա: Ինքը խոստանում է. ընդդիմադիրների օրենսդրական նախաձեռնությունները չեն դրվի ԱԺ-ի «ամենահեռու դարակում»:
Մարուքյանի ելույթից հետո ԱԺ պատգամավորները նրան հարցեր ուղղեցին:
Արտակ Զեյնալյանը Մարուքյանին ուղղեց նույն հարցերն, ինչ ԱԺ մյուս թեկնածու Արա Բաբլոյանին:
Զեյնալյանը հետաքրքրվեց, թե ի՞նչ խնդիրներ է տեսնում ԱԺ նախագահի թեկնածու Մարուքյանը մարդու իրավունքների ոլորոտում:
Էդմոն Մարուքյանը նշեց, որ մարդու իրավունքների հետ կապված բազմաթիվ խնդիրների առկայությունը Հայաստանում առավել քան տեսանելի է ու կարծիք հայտնեց, որ չպետք է լինի մի հարց, որը Ազգային ժողովի Մարդու իրավունքների պաշտպանության մշտական հանձնաժողովում չքննարկվի:
Զեյնալյանը հետաքրքրվեց նաև, թե ինչպիսի՞ լուծումներ է առաջարկում Մարուքյանը օրենքները Սահմանադրությանը համապատասխանեցնելու, Սահմանադրական դատարանի որոշումներն ի կատար ածելու վերաբերյալ:
Մարուքյանը կարծիք հայտնեց, որ Սահմանադրական դատարանի որոշումներն ի կատար ածելու համար խորհրդարանի նախագահը կարող է խորհրդակցական մարմին ստեղծել , որը մոնիտորինգի կենթարկի ՍԴ որոշումներն ու ԱԺ համապատասխան հանձնաժողովներում դրանց վերավերյալ քննարկումներ կլինեն:
Զեյնալյանը հետաքրքրվեց նաև, թե ինչպիսի գործնական քայլեր է պատրաստվում ձեռնարկել Մարուքյանը Հայաստանում քաղաքացիական համերաշխության ոլորտում՝ հաշվի առնելով քաղաքական մեծամասնություն ու փոքրամասնություն համատեքստը:
Մարուքյանը պատասխանեց, որ քաղաքական համերաշխություն կլինի այն դեպքում, երբ քաղաքական մեծամասնությունը չի կարծի, որ եթե իրենք շատ են, ուրեմն ճիշտ են:
«Մենք շատ ենք, բայց լսում ենք ձեր կարծիքը ոչ թե լսելու, այլ հաշվի առնելու համար»,- ահա քաղաքական համերաշխության հասնելու երաշխիքն՝ ըստ Էդմոն Մարուքյանի:
Անդրադառնալով Մարուքյանի առաջ քաշած այն հարցին, թե ընդդիմադիրների օրենսդրական նախաձեռնությունները դրվում են ԱԺ -ի ամենահեռավոր դարակում, ՀՀԿ-ական պատգամավոր Գագիկ Մելիքյանն ասաց, որ ինքն էլ բազմաթիվ օրենսդրական նախաձեռնություններ ունի, որոնք հերթի մեջ են և չեն քննարկվել:
«Ես խոստանում եմ ձեր խախտված իրավունքները նույնպես վեականգնել»,- ի պատասխան՝ ասաց Էդմոն Մարուքյանը:
Գագիկ Մելիքյանը նշեց նաև, որ Մարուքյանի ելույթը լսելիս տպավորություն է ստացել, թե նա ԱԺ նախագահին պատկերացնում է որպես հիմնարկի ղեկավար, բայց ԱԺ նախագահի իրավունքների մեջ չի մտնում կարգադրել պատգամավորներին:
«Ինչպե՞ս եք ազդելու մյուս պատգամավորների քվեարկության վրա, եթե դուք փոքրամասնություն եք»,- հարց ուղղեց Գագիկ Մելիքյանը:
Էդմոն Մարուքյանը պատասխանեց, որ ինքը չի ասել, թե պետք է ազդի քվեարկության վրա: «Ես լավագույնս պատկերացնում եմ, թե իշխանական բուրգում ով է ԱԺ նախագահը»,-ասաց Մարուքյանը եւ վստահեցրեց, որ ԱԺ-ին երբեք որպես հիմնարկի չի վերաբերվել ու կոչ արեց քվեարկել իր օգտին:
ՀՀԿ պատգամավոր Խոսրով Հարությունյանը հիշեցրեց, որ Էդմոն Մարուքյանը թեզ ուներ, որ խորհրդարանականները պետք է զենք կրեն, զինված լինեն:
Մարուքյանը հիշեցրեց, որ երբեք չի ասել, որ պատգամավորները պետք է զենք ունենան հանձնաժողովներում քննարկումների ժամանակ, իրար հետ հաշիվ մաքրելու համար:
«Երբեմն ԱԺ հանձնաժողովներում, միջանցքներում կրքերն այնքան են բորբոքվում, որ որտե՞ղ է երաշխիքը, որ այդ ինքնապաշտանության միջոցը չի օգտագործվի»,- հարցրեց Խոսրով Հարությունյանը:
Էդմոն Մարուքյանն էլ ասաց, որ երաշխիքն այն է, որ ԱԺ-ի տարածք պատգամավորները զենքով չեն կարող մտնել:
ԱԺ պատգամավորները Մարուքյանի հետ հարուպատասխանից հետո գնացին փակ քվերակության՝ ԱԺ նախագահ ընտրելու:
Մեկնաբանել