HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Բագրատաշենի մաքսակետի պետը վստահեցնում է, որ օրենքը բոլորի համար հավասար է գործելու

Բագրատաշենի մաքսակետից առևտրականների դժգոհությունները չեն դադարում: Հունիսի 9-ին մոտ 30 ավտոմեքենա փակել է մաքսային կետ գնացող ճանապարհը: Մայիսի 7-ին մաքսակետի մուտքի մոտ բողոքի ցույց են իրականացրել 100-ից ավելի առևտրական կանայք: Բագրատաշեն և Պտղավան գյուղերում խոշորացումից հետո՝ հունիսի 12-ին, գյուղացիները մեզ հետ զրուցելիս պնդում էին, որ մաքսակետում սահմանափակումներն ու կոշտ վերաբերմունքը շարունակվելու դեպքում դժգոհությունները կարող են վերածվել մաքսակետին հարող բնակավայրերի բնակչության սոցիալական ընդվզումների:

«Հետք»-ի  հարցերին պատասխանում է  Բագրատաշենի մաքսային կետի նորանշանակ պետ  Հովհաննես Հարությունյանը:  

- Որո՞նք են բնակչության կողմից` Բագրատաշենի մաքսակետի շուրջ վերջին ամիսներին ստեղծված լարվածության պատճառները:

- Լարվածությունը կապված է օրենսդրական դաշտի հետ, քաղաքացիները ուղղակի ուզում են առանց մաքսային ձևակերպումների ապրանքային քանակություն անցկացնել մաքսակետով: Նրանք պարզաբանում են, որ տարածաշրջանի բնակիչներ են, և ամեն օր կարող են մի քանի անգամ անցնել-դառնալ հայ-վրացական անցակետը: Բայց մեր օրենսդրությունը, մաքսային միության օրենսգիրքը և «Մաքսային կարգավորման մասին» օրենքը դա թույլ չեն տալիս:

Յուրաքանչյուր քաղաքացու, սահմանված չափերով, ամսական մեկ անգամ թույլատրվում է որոշակի ապրանքատեսակներ, որոշակի քանակով ներմուծել Հայաստան, շեշտում եմ` անձնական օգտագործման համար: Հիմնականում էստեղ մարդիկ կան՝ օրական մի քանի անգամ սահմանը հատելով՝ ապրանքային քանակություն են մտցնում: Տեսեք՝ օրվա կտրվածքով 8-10 տոննա գյուղմթերք է մտնում հանրապետությունԷդ կտրվածքից ելնելով՝ պարզ է դառնում, թե մեր շուկայում ներքին արտադրողի հետ ինչ կարող է կատարվել: Էդ ապրանքները առևտրականները արտոնության ձևով են ուզում մտցնել՝ չվճարելով ո´չ հարկ, ո´չ տուրք, ո´չ մաքսավճարներ, ու դա մտնում է ներքին շուկա: Այստեղ մեր արտադրողների հետ մենք խնդիր ենք ունենումԷս է խնդիրը:

- Ի՞նչ ծրագրեր ունենք մաքսակետում բնակչությանը պատշաճ սպասարկելու համար:

- Բնակչության հետ հենց առաջին օրվանից էդ խնդիրները եղել են: Բնակչությունը առաջին հերթին հարց է բարձրացնում, թե աշխատատեղ չունեն, առևտրով են ապրում: Հասկանում եմ: Երբ փորձեցին ճանապարհ փակել, բոլորին էլ ընդունել եմ: Մարդիկ են եղել՝ առանձին են եկել ինձ մոտ, համայնքապետի հետ նաև խմբով են եկել, իրենց հետ ես զրուցել եմ: Բոլորին էլ  պատշաճ ձևով ներկայացվել է մեր օրենսդրական դաշտը: Իսկ ծրագրեր՝ Բագրատաշենի կետի հետ կապված, դա պետեկամուտների կոմիտեի ծրագիրն է: Ամեն ինչ արվելու է, որ մաքսակետով քաղաքացիները անցնեն՝ պատշաճ սպասարկում ստանալով: Առավել ևս այս պայմաններում` մեզ համար դա պարտադիր պայման է դառնում:

- Առևտրականներն ասում են, որ մինչև հիմա մաքսակետով անցնելիս իրենք խնդիր չեն ունեցել, թեև Ձեր նշած օրենքը գործում է 2015թ.-ից:

- Չեմ կարծում, որ նման բան եղել է: Նաև վստահ եմ, որ էդ կարգի չի եղել: Եթե ապրանքների տեղափոխման հաճախականությանն ենք նայում, մի ընտանիքը կարող էր, տարբեր ընտանիքի անդամների անունները գրանցելով, օրական մի 400 կգ գյուղմթերք անցկացնել: Իսկ դա միանշանակ մեր ներքին տնտեսությանը վնասում է: Էստեղ ուրիշ հարց էլ կա: Էդ ապրանքները, որ ներկրվում է Հայաստան՝ օտարերկրյա՝ 3-րդ երկրների ապրանքներ են, ու էդ քանակությունը, եթե մենք նայում ենք 50 կգ քանակայինով, օրական դառնում է մոտ 10 տոննա:

Ու դա դառնում է ԵՏՄ ապրանք: Ռուսաստանի Դաշնության  համապատասխան մարմինների կողմից ռիսկերի գնահատում է կատարվել, որ օտարերկրյա ապրանքերը, որպես հայկական, արդեն Հայաստանից գնում են Ռուսաստան: Հասկանու՞մ եք, մենք միություն ենք և պետք է պաշտպանենք մեկս մյուսի տնտեսական սահմանները: Էս խնդիրն էլ կա: Այսինքն՝ էդ ապրանքերը մարդիկ իրենց անձնականի համար չեն ներկրում: Այդ  ապրանքները գալիս են՝ կոնկրետ չգրանցված ձեռնարկատիրությամբ զբաղվելու համար:

Մենք շատ լավ գիտենք, որ Ռուսաստանը արգելք էր դրել թուրքական գյուղմթերքի վրա, չէ՞: Հիմա  էդ ապրանքերը, որ ներկրվեցին Հայաստան, ասենք՝ բանջարեղենը, միրգը, դուք հետո ո՞նց կտարբերեք՝ թուրքական, վրացական, թե հայկական են: Անհնար ա: Դա դառնում է հայկական ապրանք ու մեքենաներով գնում Ռուսաստան: Էնտեղ արդեն ռիսկը այնպես դրվեց, որ հայկական մթերքների հանդեպ շատ խիստ էին սկսում մոտենալ: Այդ ապրանքը, մտնելով Հայաստան, մեծ վնաս է հասցնում հենց մեր տնտեսություններին:  

- Առևտրականները պնդում են, որ մաքսակետի խստացումները սկսվեցին ադրբեջանական խնձորի՝ դեպի Հայատան ներկրումը բացահայտվելուց հետո: Իսկապես կապ կա՞ խնձորի հետ:

- Ինչո՞ւ պետք է կապվի խնձորի հետ: Խնձորը մի դեպք է, որն արձանագրվել է, փաստ է, կա: Մեր մաքսային գործունեությունը ինչ-որ մի տեսակի հե՞տ է կապված, իհարկե, ոչ: Եթե մարդկանց ասում ես, որ սա է օրենքը, էսպես պետք է աշխատես, դա խստացո՞ւմ է:

- Բայց դա խնձորից հետո ասվեց, չէ՞:

- Խնձորի բացահայտման ժամանակ ես այստեղ չեմ եղել: Իհարկե, յուրաքանչյուր մեր արձանագրած դեպքից հետո մենք նկատում ենք ռիսկի պրոֆիլ, որին սկսում ենք ավելի ուշադիր հետևել: Յուրաքանչյուր դեպքի հետ կապված մենք սկսում ենք խորը ուսումնասիրություն, որպեսզի բացառենք մյուս դեպքերը:

- Ամեն դեպքում, ադրբեջանական խնձորի պատմության հետ կապված, Բագրատաշենի մաքսակետի պետ փոխվեց, 5 մաքսավոր կալանավորվեց: Ինչպե՞ս կբացատրեք դա:

- Դե պարբերաբար մաքսակետում ստուգումներ լինում են: Հետևողական աշխատանք է տարվում: Գիտեք, կոռուպցիոն ռիսկ ասելը մի քիչ մեզ համար դժվար է, հատկապես, որ ես դա գնահատեմ: Իհարկե, պարբերաբար աշխատանքեր տարվում են բարելավելու մեր մաքսային գործունեությունը՝ կապված աշխատակիցների և օրենսդրական դաշտի հետ: Բայց դա կապել մաքսակետի պետի փոփոխության հետ, ինձ թվում է՝ ճիշտ չէ:  

- Կալանավորների մասով ի՞նչ կարող եք ասել:

- Կներեք, կալանավորների մասով ոչինչ չեմ կարող ասել, որովհետև ես եկել եմ, ու մաքսատանը այնքան աշխատանքեր կան. ես չեմ կարողացել խորանալ:

- Առևտրականները պնդում են, որ հատկապես խոշոր օլիգարխների բեռնատարները արտոնյալ կարգավիճակով են անցնում մաքսակետով:

- Գիտեք, ժողովուրդը, որ սկսում է բողոքել, մազը սկսում է մի մեծ բան սարքել: Էդպես չի: Նախ չգիտեմ՝ ովքեր են էդ օլիգարխները և նրանց  վարորդները, բոլորն էլ այսօր օրինական կարգով անցնում են բոլոր տեխնիկական միջոցներով, զննվում են, կապարակնքվում են, ռենտգեն ապարատներով են ստուգվում, նման բան չկա: Իսկապես եմ ասում՝ չկա:

- Դուք բացառու՞մ եք մաքսավորների պաշտոնական դիրքի չարաշահումների հնարավորությունը:

- Բերեք բոլորի տեղը ես պատասխան չտամ: Բայց նման դեպքերը խիստ հսկողության տակ են այսօր, որ հանկարծ չլինեն: էլի եմ ասում՝ ժողովուրդը մի փոքր բանը մեծացնում է, որպեսզի ինքը օրենքին չենթարկվի: Էս ապրանքային քանակությունները հիմա սկսեցին խելոք ձևակերպել, ի՞նչն է խնդիրը: Ձևակերպեք, տարեք, ոնց որ մյուսներն են ձևակերպում: Մեծ քանակություն բերողը ձևակերպում է, վճարումները անում է, գին է չէ՞ առաջանում: Պահպանության ծախսեր ունի, մի հատ պատկերացրեք մեծ ներկրողների գործունեությունը, աշխատողներ, սառնարաններ ունի: Ու հանկարծ  էս մարդիկ բերում են առանց մաքս վճարելու:  

- Ի՞նչ միջոցներ եք ձեռնարկում ադրբեջանական խնձորի ներկրման դեպքը չկրկնելու համար:

- Դե ամեն քայլ կատարվում է, բայց ես դա կոռուպցիա չէի ձևակերպի: Կձևակերպեի թյուրիմացություն, աշխատանքային դիրքում թերանալ:  

- Բայց մեծ քանակությամբ խնձոր չի՞ անցել, կամ ո՞նց է ադրբեջանական խնձորը հայտնվել Հայատանի շուկայում:

- Քանակը չգիտեմ, բայց գիտեմ, որ մեծ քանակության չի եղել: Դե, փաստորեն կանաչ խնձորները անց են կացվել հայկական շուկա, որը ադրբեջանական է եղել: Սա է եղել: Իսկ թե ոնց է հայտնվել, այս պահին քննություն է գնում, կպարզվի՝ ոնց է հայտնվել հայկական շուկայում:

- Բնակչությունն առավել դրական է գնահատում վրացական մաքսավորների, քան մեր մաքսավորների աշխատելաոճը: Ինչպե՞ս կբացատրեք դա:    

- Էդպես չի, վրացական կողմից մի քանի անգամ մեքենաները հետ են վերադարձվում Հայաստան: Վրաստանում մեր բնակիչները խելոք հերթ են կանգնում, ավելի քաղաքակիրթ ձևով են իրենց պահում: Անկեղծ եմ ասում: Այ, փորձեք անցնել սահմանային կետով, կտեսնեք: Հենց ոտները դնում են հայկական հողի վրա, չգիտես ինչու, բոլորը սկսում են բողոքել: Ունենք բեռնատարների կուտակումներ, որ պայմանավորված է Փոթիում լաստանավի կանգնելու հետ․ բեռնատարները սկսում են միաժամանակ շարժվել: Կուտակումներ են լինում դրա հետ կապված: Տեսնենք՝ ինչ բողոք են ներկայացնում: Ասում ենք` ընկե´ր ջան, եթե Վրաստանի սահմանին ժամերով էդպես խելոք կանգնում ես, կամ Լարսում օրերով կանգնում ես, փորձու՞մ ես էդպես բողոք ներկայացնես: Հերթ է չէ, գնում է հերթը: Էստեղ՝ չէ, պետք է իրար հետ վիճաբանեն:

- Գուցե դա մաքսատանը տիրող անարդարությունի՞ց է:

- Վստահաբար ասում եմ՝ օրենքը բոլորի համար է գործում: Վստահեցնում եմ նաև, որ օրենքը բոլորի համար հավասար է լինելու:

 

Մեկնաբանություններ (1)

Տարոն
, լավ է ասում: Իհարկե, ձեր համար դժվար է գնահատել կոռուպցիոն ռիսկը, ձեր մոտ ռիսկ չկա, կա իրական կոռուպցիա: Դա էլ գնահատվում է պաշտոնական երկարակեցությամբ, ժամանակին ու ճիշտ մուծվելու կարգապահությամբ: Դու էդ հարցերը տոչնի բռնի, մնացածը իրա խոդով կգնա, մի մտածի...

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter