Վթարի ենթարկված միկրոավտոբուսը սպասարկող ընկերությունը գրանցվել է 1 շաբաթ առաջ
Ինչպես հայտնել էինք՝ երեկ կեսօրին Ռուսաստանի Դաշնության Տուլայի շրջանում իրար էին բախվել «ԿամԱԶ» մակնիշի բեռնատար ավտոմեքենան և «Իվեկո» մակնիշի միկրոավտոբուսը։ Պահատարի հետևանքով կային տուժածներ և մեկ զոհ։
Արտակարգ իրավիճակների նախարարության հաղորդած տեղեկատվությամբ՝ միկրոավտոբուսը Երևանից ուղևորվում էր Նիժնի Նովգորոդ։
«Հետք»-ին կապի և տեղեկատվական տեխնոլոգիաների նախարարի մամուլի խոսնակ Անահիտ Սիմոնյանը հայտնեց, որ իրենց ունեցած նախնական տվյալներով միկրոավտոբուսը պատկանել է «Քոչար-տրանս տուր» ընկերությանը: Համաձայն ԱՆ իրավաբանական անձանց պետական ռեգիստրի տվյալների, այն գրանցվել է ընդամենը մեկ շաբաթ առաջ՝ հունիսի 12-ին: Սեփականատերը Արթիկում գրանցված Արամ Բենոյի Քոչարյանն է:
Ընկերությունը Հայաստան-Ռուսաստանի Դաշնություն ոչ կանոնավոր ուղևորափոխադրումներ է կատարել: Նախարարությունը պարզել է, որ իրենց մոտ գրանցված կանոնավոր ուղևորափոխադրումներ իրականացնողների ցանկում այս ընկերությունը ներառված չէ։
Վթարի պատճառով զոհվել էր Ռուսաստանի Դաշնության քաղաքացի, 56-ամյա Նասիրով Օթարը, իսկ տուժել 9 մարդ, որոնցից 6-ին տեղափոխել էին Ստուպինոյի, 3-ին` Տուլա քաղաքի հիվանդանոց:
Առողջապահության նախարարության հասարակայնության հետ կապերի բաժնից հայտնեցին, որ, քիչ առաջ ստացած տվյալներով, երեկ երեկոյան Ստուպինոյի հիվանդանոցից տուժածներից 6-ը դուրս է գրվել, դեռևս 3 քաղաքացի շարունակում է բուժում ստանալ: Նրանց առողջական վիճակը միջին ծանրության է։ Տուլայի քաղաքային հիվանդանոցում ևս 3 տուժած կա, որոնցից 2-ը երեխաներ են։ Նրանց առողջական վիճակի մասին տեղեկատվություն առողջապահության նախարարությունը Ռուսաստանի Դաշնությունից կստանա ավելի ուշ։
Լուսանկարը՝ ՀՀ ԱԻՆ-ից
Մեկնաբանել