Ամալյա Մարգարյան

Էրեբունի և Նուբարաշեն ընդհանուր իրավասության դատարանը՝ Վարդան Գրիգորյանի նախագահությամբ, այսօր մեղավոր ճանաչեց գործարար, ադամանդագործ Աշոտ Սուքիասյանին և դատապարտեց 16 տարվա ազատազրկման: Դատարանը վճռել է մոտ 8 մլրդ 919 մլն դրամ բռնագանձել՝ ի օգուտ Փայլակ Հայրապետյանի և 632 մլն 403 հազար դրամ՝ ի օգուտ Հայրապետյանի որդու:

Նախքան խորհրդակցական սենյակ գնալը և դատավճիռ կայացնելը՝ ամբաստանյալ Աշոտ Սուքիասյանն իր վերջին խոսքում հայտարարեց, որ իրեն մեղավոր չի ճանաչում և ասաց. «Տպավորությունն այնպիսին է՝ կարծես ինձ մահապատժի են տանում: Լավ կլիներ, որ որպես առաջին քրիստոնյա ազգ, մենք Սուրբ գրքի վրա երդվեինք»:

Հիշեցնենք, որ ամբաստանյալ Աշոտ Սուքիասյանի նկատմամբ մեղադրանք էր առաջադրվել խարդախությամբ ուրիշի առանձնապես խոշոր չափերով գույքի նկատմամբ իրավունք ձեռք բերելու, հանցավոր ճանապարհով ստացված խոշոր չափերով եկամուտներն օրինականացնելու, չարամտորեն խոշոր չափերով հարկեր, տուրքեր և պարտադիր այլ վճարումներ կատարելուց խուսափելու համար: Նրա նկատմամբ մեղադրանք էր առաջադրվել Քրեական օրենսգրքի 190-րդ հոդվածի 3-րդ մասի 1-ին կետով՝ առանձնապես խոշոր չափերի փողերի լվացում, 178-րդ հոդվածի 3-րդ մասի 1-ին կետով՝ առանձնապես խոշոր չափով խարդախություն կատարելը, 205-րդ հոդվածի 2-րդ մասով՝ հարկերից, տուրքերից կամ պարտադիր այլ վճարումները վճարելուց չարամտորեն խուսափելը:

Այսօր իր խոսքի ընթացքում Սուքիասյանը ևս մեկ անգամ նշեց, որ իր կողմից որևէ խարդախություն չի կատարվել, և Փայլակ Հայրապետյանն ինքն է սեփական գույքը հանձել Աշոտ Սուքիասյանին և խնդրել գրավադրել այն:

Աշոտ Սուքիասյանը Փայլակ Հայրապետյանին և նրա որդուն պատկանող գույքի գրավադրումից 2010թ. հունիսի 25-ից մինչև 2011-ի հունիսի 15-ը «Ամերիաբանկ» ՓԲ-ից մաս-մաս ստացել է 10 մլն 700 հազար ԱՄՆ դոլար վարկ, սակայն չի կատարել վարկային պայմանագրով նախատեսած պարտավորությունները:  Այս մասին «Հետք»-ն անդրադարձել է «Օֆշորային լաբիրինթոս` հայկական սցենարով» հոդվածաշարում: Իսկ «Ամերիաբանկը» շարունակել է այդ ընթացքում գումարներ փոխանցել Կիպրոսում գրանցված մի քանի ընկերություններին, գումարի  մի մասը հետագայում վերադարձվել է  «Ձորագյուղ» Ա/Կ-ի հաշիվներին, որը պատկանում է Աշոտ Սուքիասյանին, նրա կնոջն ու դստերը: Բանկից ստացած վարկային գումարներից փոխանցվել է նաև օֆշորային գոտիներում գրանցված մի քանի ընկերությունների հաշվեհամարներին, որոնց բաժնետերի շարքում, ըստ Կիպրոսի ռեգիստրի պաշտոնական կայքի, եղել են նախկին վարչապետ Տիգրան Սարգսյանը և արքեպիսկոպոս Նավասարդ Կճոյանը: Հետագայում նախկին վարչապետը հայտարարել էր, որ որևէ կապ չունի գրանցված ընկերության հետ, նույնը պնդել է նաև Նավասարդ Կճոյանը: Իսկ Աշոտ Սուքիասյանը հայտարարել էր, որ ինքը կեղծել է այդ անձանց ստորագրությունները՝ առանց նրանց համաձայնության:

Դատավճռի հրապարակումից հետո Փայլակ Հայրապետյանը հայտնեց, որ կցանկանար, որպեսզի Սուքիասյանին դատապարտեն ազգի դավաճանի հոդվածով, սակայն եղած դատավճիռը ևս գոհացնում է: