Խորհրդարանը հատուկ ընթացակարգով քննարկում է կառավարության կողմից ներկայացված «Զինվորական ծառայության և զինծառայողի կարգավիճակի մասին» նախագծերի փաթեթը, որով մի շարք փոփոխություններ են նախատեսվում իրականացնել, ինչպես օրինակ` ակադեմիական տարկետումը տրամադրելու կարգը խստացնելը։

Նախագծի հիմնական զեկուցող, պաշտպանության նախարար Վիգեն Սարգսյանին հարց ուղղեց «Ելք» խմբակցության պատգամավոր Արարատ Միրզոյանը՝ հիշեցնելով վերջինիս խոսքերը, որ կարևոր է՝ նախագիծն ընդունվի կոնսենսուսով:

«Այդ կոնսենսուսին հասնելու համար որքա՞ն է ձեր փոխզիջումային պատրաստակամությունը, քանի որ բազմաթիվ լավ դետալներին զուգահեռ կան որոշ դետալներ, որոնք հասարակության, նաև խորհրդարանականների կողմից չեն ընդունվել»,- ասաց Միրզոյանը:

Նախարարն արձագանքեց, որ հանրային քննարկումների նպատակը դա էր, և չի եղել որևէ բովանդակային առաջարկ, որը չի ներառվել «Պատիվ ունեմ» և «Ես եմ» ծրագրերում:

«Ես բավական ճկուն եմ քաղաքականություն մշակելիս և արել եմ ամեն ինչ, որ բոլորի ձայնը լսելի լինի»,- ասաց Սարգսյանը՝ հավելելով, որ իրենք ընդամենն իրավական դաշտն են ձևավորում, բայց նախատեսված է, որ ծառայության պայմանները և կանոնները պետք է սահմանվեն կառավարության կողմից:

«Այդ կողմից կարող ենք լրացուցիչ դեպքեր քննարկել գիտությամբ զբաղվող առաձնահատուկ հաջողության հասած երիտասարդ գիտնականների ծառայության հատուկ պայմաններ ապահովելու համար: Բայց մեր քաղաքականությունը ելնում է նրանից, որ պետք է ծառայեն բոլորը, ով ի վիճակի է ծառայել որպես սպա՝ բարձրագույն կրթություն ունեցող, կամ գիտական ներուժ ունեցող մարդը կարող է ծառայել որպես սպա, ով չի ցանկանում, ուզում է արագ երկու տարի շարքային ծառայություն անցնել, կարող է այդ տարբերակն ընտրել: Որևէ պարտադրանք այս քաղաքականություններն իրենց մեջ չեն պարունակում, ընդամենը լրացուցիչ հնարավորություն է տալիս ընտրելու, թե ինչ ձևով է քաղաքացին իր սահմանադրական պարտքը կատարում»,- նկատեց Սարգսյանը:

Նախարարը հստակեցրեց՝ իր պարտքը կատարել է որպես սպա. «Որովհետև այդ պահին ունեցել եմ երեք բարձրագույն կթություն, թեև ունեցել եմ հնարավորություն այդ կրթությամբ աշխատել բազմաթիվ միջազգային կազմակերպություններում, որի համար մեր օրենքները տալիս էին տարկետում, բայց ես ընտրել եմ տարբերակը՝ ծառայելու ԶՈւ-ում որպես սպա և հպարտ եմ այդ տարիներով: Համարում եմ, որ այդ երեք տարին ինձ շատ բան է տվել և գիտությունից էլ հետ չեմ մնացել առանձնապես, որովհետև դրանից հետո մեծ ոգևորությամբ դասավանդել եմ տարբեր մագիստրոսական ծրագրերում: Թեև ժամանակ չեմ ունեցել թեկնածուական թեզ պաշտպանել, բայց թեզերի հեղինակներին ինչ-որ առումով չեմ էլ զիջում՝ քաղաքական գիտությունների և միջազգային հարաբերությունների հարցերում: Դա է իմ մոտեցման առանցքը, իսկ մնացածը կարելի է քննարկել»:

Հիշեցնենք, որ ըստ Վիգեն Սարգսյանի կենսագրական տվյալների՝ վերջինս 2000-2003 թվականներին ծառայել է ԶՈՒ-ում՝ որպես պաշտպանության նախարարի ռեֆերենտ։

«Ելք» խմբակցության պատգամավոր Մանե Թանդիլյանը պաշտպանության նախարարից հետաքրքրվեց, թե արդյոք վերջինս հանդիպե՞լ է բողոքող ուսանողների հետ, որոնք դժգոհում են ակադեմիական տարկետման մասին օրենքով առաջարկվող փոփոխությունից։

Սարգսյանն ասաց, որ վերջին օրերին բազմաթիվ  ուսանողների հետ է հանդիպել, սակայն հանդիպումները չի հանրայնացրել: «Չգիտեմ՝ ձեր նախընտրած ուսանողները եղել են, թե ոչ, բայց շատերի հետ հանդիպել եմ»,- ասաց նա։

Թանդիլյանն ասաց, որ դժգոհող ուսանողները մի շարք առաջարկություններ ունեն, այդ թվում՝ տարկետման քանակը կրճատելը, որ լինի ռոտացիոն կարգով, նախարարը, սակայն, ասաց, որ թվերը կրճատելը մեկ այլ խնդիր է առաջացնելու։ «Նեղանալու է ոսկե երիտասարդության այն շրջանակը, որոնք այդ քիչ տարկետումից կարողանալու են օգտվել: Ես դեմ եմ դրան. կա'մ բոլորը ունեն տարկետում, կա'մ ոչ ոք չունի, դա է իմ սկզբունքային մոտեցումը»,- ասաց Սարգսյանը։

Մանե Թանդիլյանը հետաքրրքվեց նաև, թե ինչպիսին է նախարարի մոտեցումը 27 տարեկանը լրանալուց հետո որոշակի վճարումների դիմաց հետախուզման դադարեցման մասին, արդյոք օրենքը նախատեսո՞ւմ է վերացնել, թե՞ ոչ։ Վիգեն Սարգսյանն ասաց, որ այդ հարցում իր մոտեցումները չեն փոխվելու։

«Ես գիտեմ, որ պատգամավորները նոր նախագիծ են նախատեսում, երբ այն կլինի, կխոսենք։ Ես դեմ եմ այդ նախագծին, առիթ ունեցել եմ դրա մասին խոսել այս դահլիճում, իմ մոտեցումները չեն փոխվելու: Ես համարում եմ, որ չի կարելի գումարով սահմանադրական պարտականությունից ազատվել և համարել, որ ամեն ինչ նորմալ է, որ ինչ-որ մեկը փող ունի, չի ծառայում, իսկ ով անապահով է, առաջնագծում ծառայում է, իմ մոտեցումները չեն փոխվելու»,- ասաց նա։

«Ծառուկյան դաշինք» խմբակցության պատգամավոր Սերգեյ Բագրատյանն էլ հիշեցրեց, որ գրեթե միշտ համապետական ընտրությունների ժամանակ շահարկվում է այն հարցը, որ զինվորները քվեարկությունների ժամանակ ուղղորդվում են սպաների կողմից։

Պատգամավորն ընթերցեց օրենքի նախագծում տեղ գտած այդ դրույթը, ըստ որի` զինծառայողն իրավունք չունի պաշտոնական դիրքն օգտագործել ի շահ կուսակցությունների և հետաքրքրվեց, թե կատարվում է արդյոք համալիր միջոցառումների ներդրում՝ «նման երևույթներից բանակը զերծ պահելու համար»։

Նախարարը պատասխանեց, որ պատգամավորի հարցը լայն քաղաքական հարց է, որը ճիշտ կլիներ հարց ու պատասխանի ժամանակ հնչեցնել, քանի որ «քաղաքականություն իրականացնողը կառավարությունն է»․

«Միջոցներ ձեռնարկվում են, անցած ընտրությունների ժամանակ ունեցել ենք իրազեկման ծրագիր մի շարք միջազգային կառույցների հետ՝ զինվորական քվեարկության անաչառության հետ կապված։ Այսօր ունենք մեծ ծրագիր, որն իրականացնում ենք ԵԽ-ի հետ: Այս ընթացքը մշտական է, կարծում եմ՝ մեծ կարևորություն ունի նաև քաղաքացիական կրթությունը, որը դպրոցից պետք է լինի»,-նկատեց նա։