Երևան քաղաքի ընդհանուր իրավասության դատարանի Շենգավիթի նստավայրում ՊՊԾ գնդի գրավման գործով դատական նիստին այսօր հրապարակվեց գրավման օրերին իրականացված օպերատիվ հետախուզական միջոցառման շրջանակներում արված տեսանյութերի բովանդակությունը:

ՊՊԾ գնդի գրավումից հետո Ազգային անվտանգության ծառայությունը մինչև վերջին օրը, երբ «Սասնա ծռերը» հանձնվեցին, վերահսկել է գնդի և դրան հարակից տարածքներն ու ամբաստանյալների գործողությունները:

ՊՊԾ  գնդի գրավումից հետո ներսում եղած վիրավորներին օգնություն ցույց տալու համար Շտապօգնության բժիշկներ էին գնացել այնտեղ: Դրանից հետո լուր տարածվեց, որ  «Սասնա ծռերը» պատանդ են վերցրել բժիշկներին:

Տեսանյութերից մեկում երևում է, թե ինչպես են բժշկական հագուստով մի կին և տղամարդ քայլում ՊՊԾ գնդի տարածքում, և նրանց հսկում է Արամ Մանուկյանը՝ Պավել Մանուկյանի որդին: Մեկ այլ դրվագում էլ երևում է, թե ինչպես են բժիշկները Պավել Մանուկյանի ուղեկցությամբ  դուրս գալիս գնդի տարածքից:

Մեկ այլ տեսանյութում ոստիկանական մեքենաներն այրելու դրվագն է: Դրանում նկարագրվում է թե ինչպես են ամբաստանյալներից ոմանք ինչ-որ լաթի կտորներ դնում անվադողների մեջ, մեկն էլ դրանցում ինչ-որ  փոքր առարկաներ է դնում, անվադողերը բոցավառվում են: Առկա է նաև տեսանյութ, որում երևում է, թե ինչպես է մեղադրյալ Հովհաննես Հարությունյանն աստիճանի օգնությամբ պոկում Խորենացի փողոցի օդային մալուխները, և նրան օգնում է մեղադրյալ Աշոտ Պետրոսյանը:

Տեսանյութերում կան նաև բարձրաստիճան ոստիկաններ, ոմանք պատանդառված են եղել: Մասնավորապես՝ խոսքը Վալերի Օսիպյանի և Վարդան Եղիազարյանի մասին է: Վերջիններս գնդի տարածքում շրջում են «Սասնա ծռերի» ուղեկցությամբ և կրում ճիշտ նույնպիսի մարտաբաճկոններ, ինչպիսին եղել են նաև «Սասնա ծռերի» հագին: Խորենացիում ֆիքսվել է նաև ՊՊԾ գնդի գրավման ժամանակ Երևան քաղաքի ոստիկանապետ եղած Աշոտ Կարապետյանը:

Տեսանյութերում երևում է նաև լրագրողների մուտքը ՊՊԾ գնդի տարածք, ԼՂՀ անվտանգության խորհրդի քարտուղար Վիտալի Բալասանյանի անցուդարձը: Ֆիքսվել է նաև, թե ինչպես է մեղադրյալ Աշոտ Պետրոսյանը լրագրողների ներկայությամբ կրակոց արձակում, որից հետո Բալասանյանը լրագրողներին խնդրում է գնդի տարածքից դուրս գալ:

Դրվագներից մեկում էլ «Սասնա ծռերի» կոչն է ոստիկանության աշխատակիցներին: Վերջիններս, մասնավորապես, նշում են, որ իրենք ոստիկանների հետ խնդիր չունեն, որ նրանց խնդիրն իշխանությունների հետ է, և ոստիկաներին կոչ են անում վայր դնել զենքերը: «Սասնա ծռերը» համոզմունք են հայտնում, որ եթե ոստիկանները վայր դնեն զենքերը, իշխանությունը կհանձնվի:

Ժամեր տևած դատական նիստին հետազոտվեցին տեսանյութեր, որոնց բովանդակության դեմ «Սասնա ծռերի» անդամներն, ըստ էության, չեն էլ առարկում: Վերջիններս չեն նշում, թե չեն գրավել ՊՊԾ գունդը, պարզապես պնդում են, որ իրենք դիմել են օրենքով թույլատրելի ծայրահեղ միջոցի` ապստամբության:

Դատական նիստի ավարտին  Պավել Մանուկյանը ելույթ ունեցավ ու նշեց, թե տպավորություն է, որ այս նյութերը հրապարակելով՝ փորձում են ձանձրացնել, հոգնեցնել ժողովրդին:

Մանուկյանը հիշեցրեց, որ որ մարտի 16-ին լրանում է «Հաց բերողի»՝  Արթուր Սարգսյանի մահվան մեկ տարին:

Վերջինս, հիշեցնենք, գնդի գրավման օրերին իր՝  սնունդով բեռնված մեքենայով, ճեղքելով ոստիկանական պատը, մուտք էր գործել ՊՊԾ-ի տարածք:

«Արթուրը մնաց պատմության մեջ ոչ թե Հաց բերող այլ՝ լույս բերող, Արթուրը կտրեց խավարի լույսը և շող բերեց հայ ժողովրդին... եթե մենք որոտն էինք, ապա Արթուր Սարգսյանը փայլն էր»,- հայտարարեց Պավել Մանուկյանը: