Հանրային ռադիոն վերագործարկում է վրացերեն լուրերը
Հանրային ռադիոյի արտասահմանի համար տրվող հաղորդումների խմբագրությունը երկու տարվա դադարից հետո կրկին վերսկսում է իր վրացական բաժնի աշխատանքները, որը միակն է Հայստանում: Այս մասին հաղորդում է Հանրային ռադիոյի PR բաժինը:
Լուրերն այսուհետ ամեն օր հասանելի կլինեն նաև վրացերենով՝ թե տեքստային, թե ձայնային տարբերակներով: Վրացերեն լուրերը հասանելի կլինեն Հայաստանում և Հայաստանից դուրս www.armradio.info կայքի միջոցով:
«Վրացական ծառայություն ունենալը շատ կարևոր է բոլորիս համար»,- ասում է Հանրային ռադիոյի գործադիր տնօրեն Մարկ Գրիգորյանը և հավելում, որ ֆինանսական խնդիրների պատճառով չէր ստացվում վերսկսել վրացերեն լուրերի թողարկումները: Մարկ Գրիգորյանը փաստում է, որ արդեն այդ խնդիրների լուծման շեմին են և փորձել են օր առաջ գործարկել վրացական ծառայությունը:
«Հանրային ռադիոյի վրացական ծառայությունը միշտ կարևոր տեղ է զբաղեցրել վրացախոս հայերի շրջանում, մասնավորապես` Վրաստանի հայերի համար: Լրահոսն ամփոփում է հայաստանյան և միջազգային կարևոր տնտեսական, քաղաքական, մշակութային, սպորտային ու սոցիալական իրադարձությունները»,- ասվում է Հանրային ռադիոյի PR բաժնի տարածած հաղոդրագրությունում:
Մեկնաբանել