Կախված երկրորդ նախագահ Ռոբերտ Քոչարյանի վերաբերյալ գործի ընթացքից՝ հնարավոր է, որ նրա պաշտպանները երրորդ բողոքը ներկայացնեն Մարդու իրավունքների եվրոպական դատարան: Այս մասին Քոչարյանի գործով նիստի մեկնարկից առաջ լրագրողների հետ զրույցում ասաց նրա պաշտպան Արամ Օրբելյանը:

Բողոքն անհրաժեշտության դեպքում կներկայացվի Մարդու իրավունքների Եվրոպական կոնվենցիայի 18-րդ հոդվածի հիմքով: Ըստ այդ հոդվածի՝ Կոնվենցիայով սահմանված իրավունքների ու ազատությունների սահմանափակումները չեն կիրառվում որևէ այլ նպատակով, բացի այն, ինչի համար դրանք նախատեսված են:

Խոսքն, ըստ էության, Քոչարյանի՝ քաղբանտարկյալ լինելու հարցի մասին է:

«Միջազգային մի շարք կառույցների կողմից քաղբանտարկյալի վերաբերյալ տված սահմանումները վերաբերվում է նաև պարոն Քոչարանին»,- ասաց Արամ Օրբելյանը:

Պաշտպանի խոսքով՝ Հայաստանի դատական ատյաններում Քոչարյանի` քաղբանտարկյալ լինելու հարցը չի քննարկվում: «Այստեղ վեր ենք հանում իրավական խախտումները, որոնք մշակման փուլում են: ՄԻԵԴ դիմելը կախված չէ միայն այսօրվա դատական նիստի արդյունքից, որը իհարկե կարևոր է, բայց հաշվի է առնվելու նաև գործի ընթացքը»,- ասաց Արամ Օրբելյանը:

Պաշտպանը տեղակացրեց, որ իրենք քննարկում են Հայաստանում և Հայաստանից դուրս տարբեր իրավաբանների և իրավաբանական կառույցների դիրքորոշումները ևս բողոքում ներառելու հարցը:

«Այս պահին քննարկումների մեջ ենք Ֆրանսիայի և Ռուսաստանի իրավական դոկտորների հետ, որոնց կողմից Քոչարյանին առնչվող տարբեր հարցերի վերաբերյալ տարբեր կարծիքներ են հնչել»,- ասաց Օրբելյանը:

Հիշեցնենք, որ 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ Հատուկ քննչական ծառայությունում քննվող քրեական գործով 2018 թվականի հուլիսի 26-ին Հայաստանի Հանրապետության պաշտոնաթող նախագահ Ռոբերտ Քոչարյանին մեղադրանք է առաջադրվել Քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը: Առաջին ատյանի դատարանը նրա նկատմամբ խափանման միջոց էր ընտրել կալանավորումը, սակայն Վերաքննիչ դատարանի որոշումից հետո Քոչարյանն ազատ էր արձակվել:

Վճռաբեկ դատարանը նոյեմբերի 15-ին բեկանել է Ռոբերտ Քոչարյանի նկատմամբ ընտրված խափանման միջոց կալանավորումն անձեռնմխելիության հիմքով վերացնելու վերաբերյալ Վերաքննիչ դատարանի որոշումը, և գործն ուղարկվել է նույն դատարան՝ նոր քննության: Դեկտեմբերի 7-ին դատարանը՝ նախագահությամբ դատավոր Ռուբիկ Մխիթարյանի, որոշել էր ուժի մեջ թողնել Քոչարյանին կալանավորելու վերաբերյալ 1-ին ատյանի դատարանի որոշումը, որից հետո Քոչարյանը կալանավորվել է:

Դատարանն այժմ քննում է նրա կալանքի ժամկետը երկարացնելու և գրավի դիմաց ազատ արձակելու երկու միջնորդությունները: