Հարկային եկամուտները 2018 թվականին երկնիշ աճ են գրանցել
Հայաստանում հարկերի հաշվառման և մեթոդաբանության առումով 2018 թվականը համարվում է անցումային տարի։ 2018թ. հունվարի 1-ից Հարկային օրենսգրքի ուժի մեջ մտնելուն զուգահեռ փոփոխվել է նաև պետական բյուջեի հարկային եկամուտների հաշվառման մեթոդաբանությունը։
Ինչպես այսօր լրագրողների հետ զրույցում ներկայացրեց Պետական եկամուտների կոմիտեի (ՊԵԿ) նախագահ Դավիթ Անանյանը, ներմուծվել է նոր գործիք՝ գանձապետական միասնական հաշիվը։
Մինչև 2018 թվականը պետական բյուջեի հարկային եկամուտ է բնորոշվել փաստացի պետական բյուջե վճարված հարկերի հանրագումարը՝ հանած հարկ վճարողներին վերադարձված գումարները (ավելացված արժեքի հարկ, եկամտային հարկ և այլն), այսինքն՝ հարկերի զուտ ներհոսքը։
Իսկ 2018 թվականի հունվար 1-ից հարկային եկամուտ է բնորոշվում զուտ ներհոսքը, բայց միայն այնքանով, որքանով դրա դիմաց ներկայացված է հարկային հաշվարկ։ Այսինքն՝ պետական բյուջե փաստացի վճարված հարկային մուտքերի հանրագումար՝ հանած հարկ վճարողներին վերադարձված գումարները, որոնց դիմաց ներկայացվել է հարկային հաշվարկ կամ ստուգման ակտ (այսինքն՝ մարված հարկային պարտավորությունն է համարվում հարկային եկամուտ)։
Նախորդ մեթոդաբանությամբ հարկային եկամուտները կազմել են 1 տրլն 306.3 մլրդ դրամ
Ի սկզբանե 2018 թվականի պետական բյուջեի մասին օրենքով պլանավորված էր ապահովել 1 տրլն 248.5 մլրդ դրամի հարկային եկամուտ։ Տարվա ընթացքում կառավարության որոշումների արդյունքում այս ցուցանիշը փոփոխվեց և դարձավ մոտ 1 տրլն 262 մլրդ դրամ։ Եվ տարեկան փաստացի արդյունքներով՝ հարկային եկամուտների ծավալը 2018 թվականին կազմել է 1 տրլն 306.3 մլրդ դրամ։ Այսինքն՝ ճշտված պլանի համեմատ՝ 3.5 %-ով ավելի շատ հարկ է հավաքագրվել։
2017 թվականի համեմատ՝ հարկային եկամուտներն աճել են 165.3 մլրդ դրամով կամ 14.5 %-ով։
Ինֆոգրաֆիկայում հարկային եկամուտների ցուցանիշներն են վերջին 6 տարիների կտրվածքով։ Տվյալները տրամադրել է Պետական եկամուտների կոմիտեն։
Ցուցանիշները ներկայացված են մլրդ դրամով։
2018 թվականին ընդհանուր առմամբ հավաքագրվել են 1 տրլն 403.3 մլրդ դրամի հարկեր, որից 1 տրլն 68 մլրդ դրամը՝ հարկային մարմինների կողմից, 335.3 մլրդ դրամը՝ մաքսային։ Նույն ընթացքում հարկ վճարողներին է վերադարձվել 97 մլրդ դրամ։
Նոր մեթոդաբանությամբ հարկային եկամուտները կազմել են մոտ 1 տրլն 258 մլրդ դրամ
ՊԵԿ նախագահ Դավիթ Անանյանը ներկայացրեց նաև հարկային եկամուտների ծավալը՝ հաշվարկված նոր մեթոդաբանությամբ։ Ըստ դրա՝ հարկերը կազմել են 1 տրլն 257.9 մլրդ դրամ։
2017 թվականի համեմատ՝ հարկային եկամուտները, եթե համեմատում ենք նոր մեթոդաբանությամբ ստացվող համադրելի թվի հետ, աճել են մոտ 140 մլրդ դրամով կամ 12.5 %-ով։
Ինչ վերաբերում է գերավճարներին, ապա ըստ ՊԵԿ-ի տվյալների՝ 2018 թվականի հունվարի 1-ի դրությամբ գերավճարները կազմել են մոտ 133 մլրդ դրամ, իսկ տարվա վերջում՝ մոտ 70 մլրդ դրամ։
Մեկնաբանել