165 միլիոն դրամ՝ «Նաիրիտ գործարան» ՓԲԸ-ի աշխատակիցների աշխատավարձերի համար
«Նաիրիտ գործարան» ՓԲԸ-ի տեխնոլոգիական համակարգերում, տարողություններում և սարքավորումներում առկա քիմիական նյութերի և սարքավորումների անվտանգ պահպանության իրականացմանը ֆինանսապես աջակցելու նպատակով կառավարությունն այսօրվա նիստին 165 միլիոն դրամ տրամադրեց:
Գումարը փոխանցվեց արտակարգ իրավիճակների նախարարության «Տեխնիկական անվտանգության ազգային կենտրոն» ՊՈԱԿ-ին:
ԱԻՆ-ը հիմնավորում է, որ այս գումարով հնարավոր կլինի վճարել «Նաիրիտ գործարան» ՓԲԸ-ի սարքավորումների անվտանգությունն ապահովող աշխատակիցների աշխատավարձերը:
Ֆինանսների նախարարությունը արտակարգ իրավիճակների նախարարությանն առաջարկել է ծախսերի ֆինանսավորումը կատարել «Տեխնիկական անվտանգության ազգային կենտրոն» ՊՈԱԿ-ի ձեռնարկատիրական գործունեությունից ստացվող միջոցների հաշվից: Սակայն ԱԻՆ-ը չի ընդունել այս առաջարկը՝ պատճառաբանելով, որ ՊՈԱԿ-ի եկամուտներն իր գործառույթների իրականացման համար են նախատեսված:
Մեկնաբանել