Երևան քաղաքի ընդհանուր իրավասության դատարանը՝ նախագահությամբ դատավոր Մեսրոպ Մակյանի, քիչ առաջ բավարարեց կաշառք ստանալու մեջ մեղադրվող քննիչ Միքայել Զադոյանին գրավի դիմաց ազատ արձակելու վերաբերյալ միջնորդությունը: 

Թեև Զադոյանը միջնորդել էր գրավի չափ սահմանել 2 մլն դրամը, դատարանն իր որոշմամբ թույլատրելի է համարել ավելի մեծ՝ 3 մլն դրամ գրավը: Դատարանի դեպոզիտ հաշվին գումարը վճարելուց հետո Զադոյանն ազատ կարձակվի:

Նշենք, որ մինչ այս դատարանը մի քանի անգամ մերժել էր Զադոյանի պաշտպանների միջնորդությունը՝ նրա նկատմամբ գրավ կիրառելու վերաբերյալ: Այսօր առաջին անգամ միջնորդությունը ներկայացրել էր անձամբ ինքը՝ Զադոյանը:

Քննիչի խոսքով՝ ինքն ազատության մեջ մնալու ընթացքում հնարավորություն ունեցել է քննությունից թաքնվելու, սակայն այդպիսի բան չի արել, իրեն թույլ չի տա նման բան:

Մեղադրող դատախազ Արա Մնացականյանը միջնորդության դեմ առարկել էր՝ նշելով, որ այն առհասարակ պետք է թողնել առանց քննության: Ըստ մեղադրողի՝ դրանում Զադոյանի խափանման միջոց կալանքը փոխելու այսօրվա միջնորդության մեջ նախկինում ներկայացված միջնորդության հիմնավորումներն են ներկայացված, դրանում նոր հանգամանքներ առկա չեն:

Նշենք, որ ըստ կաշառքի վերաբերյալ գործի՝ քաղաքացի Բաբկեն Գասպարյանը ԱԱԾ-ին հայտնել է, որ որդու մասնակցությամբ քրեական գործի շրջանակներում փաստաբան Գայանե Գալոյանի միջոցով 3000 ԱՄՆ դոլար կաշառք է տվել Էրեբունու քննչական բաժնում:

Հաղորդումից հետո ամբաստանյալի աթոռին է հայտնվել հենց ինքը՝ Գասպարյանը, որդու գործով քննիչ Միքայել Զադոյանը, փաստաբան Գայանե Գալոյանն ու Քննչական կոմիտեի Էրեբունի և Նուբարաշեն վարչական շրջանների քննչական բաժնի պետի արդեն նախկին տեղակալ Բունիաթ Եղիազարյանը, որի վերաբերյալ գործը քննվում է անջատված՝ առաջին ատյանի դատարանի մեկ այլ դատավորի վարույթում:

Ըստ գործի նյութերի՝ Բաբկեն Գասպարյանի որդուն՝ Սոս Գասպարյանին, վերագրված 112-րդ հոդվածով նախատեսված արարքը՝ դիտավորությամբ առողջությանը ծանր հարված հասցնելը, պետք է վերաորակվեր Քրեական օրենսգրքի 116-րդ հոդվածով՝ անհրաժեշտ պաշտպանության սահմանազանցում, և որդին նման պայմաններում պետք է ազատ արձակվեր, ինչը, սակայն չի արվել:

Այն բանից հետո, երբ որդու վերաբերյալ գործը մեղադրական եզրակացությամբ ուղարկվել է դատարան, Բաբկեն Գասպարյանը ԱԱԾ-ում հանցագործության մասին հաղորդում է տվել:

Քննիչ Միքայել Զադոյանը, փաստաբան Գայանե Գալոյանն ու մեկ այլ քրեական գործով անցնող Բունիաթ Եղիազարյանը չեն ընդունում իրենց մեղադրանքները: