Ալավերդու N 2 հիմնական դպրոցի շենքը սեյսմակայունության տեսակետից Հայաստանի առավել վտանգավոր դպրոցների ցանկում է
Կառավարության 2015-2030թթ. պետական հանրակրթական դպրոցների սեյսմիկ անվտանգության բարելավման ծրագրով հաստատվել է սեյսմակայունության տեսակետից Հայաստանի առավել վտանգավոր դպրոցների ցանկը: Ալավերդու Հովհ. Թումանյանի անվան N 2 հիմնական դպրոցը հայտնվել է ծրագրի N 2 հավելվածում ներկայացված՝ սեյսմակայունության տեսակետից առավել վտանգավոր դպրոցների ցանկում:
Դպրոցն ունի 340 աշակերտ, 16 դասարան: Տնօրեն Լուսինե Միքայելյանի խոսքով՝ դպրոցի պատերը ճաքել են 1988-ի երկրաշարժի հետևանքով, և տարիների ընթացքում ճաքերն ավելի են մեծացել: Այդ մասին տնօրեն Լ. Միքայելյանը 2015թ.-ի մայիսի 15-ի իր գրությամբ հայտնել է «Քաղաքաշինական ծրագրերի փորձագիտական կենտրոն» ԲԲԸ-ին:
Տնօրենի խոսքով՝ կենտրոնի ուսումնասիրության եզրակացությամբ դպրոցն ունի ամրացման խնդիրներ և կառավարության հանրակրթական դպրոցների սեյսմիկ անվտանգության բարելավման ծրագրի շրջանակներում ենթարկվելու է ամրացման՝ Ասիական զարգացման բանկի վարկային ծրագրով:
N 2 դպրոցի շենքը տիպային նախագծով, 1967թ.-ին կառուցված, քառահարկ շինություն է: Սեյսմիկ հիմնական վտանգը շենքի ձախակողմյան թևն է: Դպրոցաշինության նոր նախագծերով չի նախատեսվում 4-րդ հարկ, շենքի 4-րդ հարկը պետք է պարտադիր հանվի: «Հիմա, թե ամրացում կանեն, թե ընթացիկ վերանորոգում` կախված է դպրոցի ընդհանուր վիճակից»,- հայտնեց Լուսինե Միքայելյանը:
«Քաղաքաշինական ծրագրերի փորձագիտական կենտրոն» ԲԲԸ-ի եզրակացությամբ պարզվել է, որ շենքի ձախակողմյան լայնական պատը առաջինից երրորդ հարկերում ունի մինչև 15 մմ բացվածքով միջանցիկ ճաք, գլխավոր ճակատային պատի աջակողմյան հատվածամասի միջնապատերը ճզմված են, և կան 2-3 մմ բացվածքով ճաքեր: Ներքին պատերում կան 1-2 մմ բացվածքով ոչ միջանցիկ ճաքեր, սանդուղքներն ունեն տեղաշարժված աստիճաններ: Շենքի շրջակա սալվածքը մաշված և վնասված է, տարածքի ջրերը լցվում են հիմնատակ: Լայնական պատերի միջև եղած 17,0 մ առանցքային հեռավորությունները չեն բավարարում գործող նորմերի պահանջներին: Եզրակացությամբ շենքի վնասվածության մակարդակը դասվում է 3-րդ աստիճանի:
Մեր այցելության պահին նախագծանախահաշվային փաստաթղթեր պատրաստելու համար շենքի տեխնիկական վիճակն ուսումնասիրում էին Ասիական զարգացման բանկի ծրագրի համակարգող Հայկ Գալստյանը և Հայաստանի տարածքային զարգացման հիմնադրամի ծրագրերի փորձաքննության բաժնի վարիչ, ճարտարապետ Ռոբերտ Թերզյանը:
«Աշխատանքները նախնական ուսումնասիրության փուլում են, որից հետո պետք է որոշում կայացնենք՝ կառուցում ենք դպրոցի նոր շենք, թե ամրացնում ենք գոյություն ունեցող այս շենքը: Տեսականորեն հնարավոր է, որ կառուցվի նոր շենք: Բայց դա պետք է գնահատվի՝ որքանով է արդյունավետ: Եթե արդյունավետ լինի ամրացնելը, կամրացնենք, քանի որ տեսնում եք դպրոցը տարածք չունի, եթե կառուցվի, պետք է նույն տեղում կառուցվի: Եվ պետք է գնահատվի՝ իմաստ ունի՞ նոր շենք կառուցելը: Դրանից հետո կպատվիրենք նախագիծ, նախագծումից հետո կսկսենք շինարարական աշխատանքները: Շինարարությունը մոտավորապես կարող է սկսել 2020թ.-ի հունվարից»,- հայտնեց Հայկ Գալստյանը:
«Հետք»-ի հարցին, թե դպրոցի շենքն իր տեխնիկական ներկա վիճակով մինչև 2020թ.-ը շահագործելն արդյոք վտանգավոր չէ դպրոցի 340 աշակերտների և ուսուցիչների համար, Ռոբերտ Թերզյանը պատասխանեց.
«Եթե որևէ բան չլինի, ես նկատի ունեմ՝ երկրաշարժ չլինի, էս վիճակով դեռ կդիմանա: Բայց դա չի նշանակում, թե շենքը խնդիրներ չունի»,- պատասխանեց Հայաստանի տարածքային զարգացման հիմնադրամի ծրագրերի փորձաքննության բաժնի վարիչը:
Մեկնաբանություններ (1)
Մեկնաբանել