Վերաքննիչ քրեական դատարանը՝ նախագահությամբ դատավոր Ռուզաննա Բարսեղյանի, քիչ առաջ հրապարակեց նախկին փոխվարչապետ Արմեն Գևորգյանի խափանման միջոցի գործով որոշումը, ըստ որի՝ Գևորգյանը կմնա ազատության մեջ:

Արմեն Գևորգյանը լրագրողների հետ զրույցում ասաց, որ դատարանը մերժել է իր խափանման միջոցի վերաբերյալ Դատախազության բողոքը, ինչպես նաև իրենց՝ պաշտպանական կողմի բողոքը:

Հիշեցնենք, որ Արմեն Գևորգյանը Մարտի 1-ի գործի շրջանակներում մեղադրվում է սահմանադրական կարգը տապալելու, խոշոր չափերով փողերի լվացման և խոշոր չափով կաշառք ստանալու մեջ: Առաջին ատյանի դատարանը մերժել է նրան կալանավորելու վերաբերյալ ՀԾՔ քննիչի միջնորդությունը: Դատախազությունն այս որոշումը բողոքարկել էր:

Առաջին ատյանի դատարանի որոշումը մասնակի բողոքարկել էր նաև Գևորգյանի պաշտպանական կողմը, քանի որ դատարանը գտել է, որ Գևորգյանին փողերի լվացման դրվագով առաջադրված մեղադրանքի դեպքում առկա է հիմնավոր կասկած, որ նա կատարել է իրեն վերագրվող արարքը: Դատարանի այս դիրքորոշման հետ պաշտպանական կողմը համամիտ չէ. գտնում է, որ հիմնավոր կասկած առկա չէ:

Երկու բողոքները մի քանի օր քննելուց հետո Վերաքննիչ դատարանը հունվարի 25-ին հեռացել էր խորհրդակցական սենյակ՝ որոշում կայացնելու:

Մանրամասները՝ տեսանյութում: