Արտաքին գործերի նախարարությունը տեղեկացնում է, որ նախարար Զոհրաբ Մնացականյանն ու ԵՄ հանձնակատար Յոհաննես Հաանի համատեղ մամուլի ասուլիս են տվել։ Նախարար Մնացականյանը տեղեկացրել է, որ բավական հետաքրքիր և ծավալուն քննարկումներ է ունեցել հանձնակատար Յոհաննես Հաանի հետ։ «Կուզեմ ևս մեկ անգամ իմ գոհունակությունը և շնորհակալությունը հայտնել Հանձնակատար Հաանին այս այցի համար և այն զրույցի, երկխոսության համար, որ մենք կարողացանք ծավալել այս ժամերի ընթացքում»,- ասել է նախարարը։

Հանձնակատար Հաանն արդեն առիթ է ունեցել հանդիպելու նախագահ Արմեն Սարգսյանի, վարչապետ Նիկոլ Փաշինյանի հետ։ Զ․ Մնացականյանն ու հանձնակատարը նաև քննարկում են ունեցել փոխվարչապետ Մհեր Գրիգորյանի ներկայությամբ:

«Ունեցանք նաև պարոն Հաանի հետ մեր առանձնազրույցն օրակարգային բոլոր այն հարցերի շուրջ, որոնք վերաբերում են Հայաստան-Եվրամիություն մեր այսօրվա ընդհանուր օրակարգին։ Եվս մեկ անգամ ընդգծեցինք այն կարևորությունը, որ մենք տալիս ենք մեր հարաբերություններին, այն հիմնարար, հիմնական շարժառիթները, արժեքները, որոնք դրված են Եվրամիության հետ մեր հարաբերությունների հիմքում: Այսօրվա մեր հարաբերությունների իրավական  հիմքը՝ ՀԸԳՀ-ն, մնում է բավական էական, իրավական գործիք մեր ձեռքում, և դրա շուրջ մենք գնահատեցինք այն դինամիկան՝ ինչպես ենք իրականացնում այս գործընթացը և ինչ ծրագրեր ենք նախատեսում այս մոտակա ամիսների ընթացքում, որպեսզի արդյունավետորեն շարունակենք իրականացնել այն գործընթացը, որը վերաբերում է ՀԸԳՀ-ին»,- ասել է Զ․ Մնացականյանը:

Նախարարը տեղեկացնում է, որ անդրադարձ է կատարվել նաև վիզայի ազատականացման երկխոսության մեկնարկի գործընթացին և դրա շուրջ անհրաժեշտ քայլերին: Մանրամասն՝ տեսանյութում։