Հունվարի 30-ից «Արմավիր» քրեակատարողական հիմնարկում հացադուլի մեջ գտնվող ցմահ դատապարտյալ Վաղարշակ Ավետիսյանին այսօր ԱԺ երկու պատգամավորներ են այցելել։ Այս մասին «Հետք»-ին ասաց Արդարադատության նախարարության քրեակատարողական վարչության հանրային կապերի վարչության պետ Նոնա Նավիկյանը։ Վերջինիս խոսքով՝ Ավետիսյանին այցելել են նաև ՄԻՊ աշխատակազմի ներկայացուցիչներ։

Վաղարշակ Ավետիսյանը, սակայն, չի դադարեցրել հացադուլը և գտնվում է բժիշկների հսկողության ներքո:

Նշենք, որ Ավետիսյանը ազատազրկված է 2008 թվականից: Մեղադրվել և դատապարտվել է նույն թվականի մարտի 16-ին Գորիսի ճանապարհին տաքսու վարորդի սպանության գործով:

Նա չի ընդունել և առ այսօր չի ընդունում մեղքն իրեն վերագրվող արարքում, պնդում է, որ դատապարտվել է մեկ անձի ցուցմունքի հիման վրա։ Նշենք, որ նախկինում՝ 2018-ի օգոստոսի 1-ին ևս Ավետիսյանը հացադուլ էր հայտարարել, ինչպես նաև ինքնավնասման փորձ կատարել:

Արդարադատության նախարար Արտակ Զեյնալյանի հետ հանդիպումից հետո նա դադարեցրել էր հացադուլը: