«Սասնա ծռեր» խմբի 10 անդամների գործով ոստիկանապետ Վալերիյ Օսիպյանի հարցաքննության ժամանակ լարված մթնոլորտ ստեղծվեց:

Խմբի անդամներից Արեգ Կյուրեղյանը Վալերիյ Օսիպյանից հետաքրքվեց՝ արդյոք գնդում գտնվելու ընթացքում նրան բացատրվե՞լ է, որ սահմանադրական կարգը երկրում տապալված է, և իրենց գործողությունները ուղղված են այն պահպանելու դեմ: Օսիպյանը պատասխանեց. «Ինձ բացատրել պետք չէ, ես շատերին կարող եմ բացատրել, թե ինչ է սահմանադրական կարգը, բայց սրա շուրջ խոսակցություն եղել է»:

Կյուրեղյանի՝ ընդունե՞լ եք, որ սահմանադրական կարգը տապալված է հարցը դատարանը հանեց: Այնուհետև խմբի անդամներից Սմբատ Բարսեղյանը Օսիպյանին ինչ-որ բան ասաց, որը Օսիպյանի և Սմբատ Բարսեղյանի միջև բանավեճի վերածվեց:

Վեճը, սակայն, լսելի չէր ապակիներից այն կողմ գտնվողների համար: Այս ընթացքում Օսիպյանն ասաց. «...որևէ մեկը չփորձի որևէ բան ասել»:

Դահլիճում ներկա գտնվողներից Գևորգ Սաֆարյանը, տեղից վեր կենալով և դիմելով ոստիկանապետին, բղավեց. «Դու չպիտի ասես՝ ինչ խոսեն, լակո՛տ»:

Դատավոր Մեսրոպ Մակյանը դահլիճում ներկաներին հորդորեց պահպանել նիստի կարգը՝ հիշեցնելով, որ հակառակ դեպքում ինքը նիստը դռնփակ անցկացնելու որոշում կկայացնի:

Դատարանի այս զգուշացումը Սաֆարյանը սպառնալիք գնահատեց: