Երևան քաղաքի ընդհանուր իրավասության դատարանի դատավոր Կարեն Ֆորխոյանը երեկ քննել է Ազգային ժողովի նախկին պատգամավոր Մելիք Մանուկյանի քրոջ որդուն՝ Ռոմեն Հարությունյանին կալանավորելու վերաբերյալ միջնորդությունն ու բավարարել այն: Այս մասին տեղեկացանք Քննչական կոմիտեից: 

Հարությունյանին մեղադրանք էր առաջադրվել սպանության փորձի, կազմակերպված խմբի կողմից, զենքի գործադրմամբ խուլիգանության կատարելու, ինչպես նաև ապօրինի զենք կրելու մեջ:

Նույն դատարանի մեկ այլ դատավոր Արմեն Բեկթաշյանն էլ  քննել է Մելիք Մանուկյանի եղբորորդուն` Մովսես Մանուկյանին կալանավորվելու վերաբերյալ միջնորդությունն ու այսօր մերժել այն: Այս տեղեկությունը ևս հաստատեցին Քննչական կոմիտեից: Մանուկյանը Աբովյանում տեղի ունեցած դեպքով մեղադրվում է ապօրինի զենք կրելու, սպանության փորձի և զենքի գործադրմամբ խուլիգանություն կատարելու մեջ:

Մովսես Մանուկյանը նախկինում մեղավոր է ճանաչվել ու դատապարտվել խմբի կազմում խուլիգանություն կատարելու համար, սակայն նրա նկատմամբ կիրառվել է 2013 թվականին ՀՀ անկախության հռչակման 20-րդ տարեդարձի կապակցությամբ հայտարարված համաներումը:

Միջադեպի մյուս կողմում կանգնած, կալանքի տակ գտնվող Վարդան Գրիգորյանն, ով Ծառուկյանների ընտանիքին պատկանող ավտոտեխսպասարկման կետի աշխատակիցն է, անցնում է Աբովյանում գտնվող «Մա Պլազա» ժամանցի կենտրոնի տնօրեն Մկրտիչ Խաչատրյանի սպանության առթիվ հարուցված քրեական գործով, սակայն Գրիգորյանին սպանության մեղադրանք չի վերագրվում, նա մեղադրվում է Խաչատրյանին միջին ծանրության վնասվածք պատճառելու մեջ:

Վարդան Գրիգորյանի վերաբերյալ այժմ քննվում է մեկ այլ գործ ևս: Վերջինս մեղադրվում է Քրեական օրենսգրքի 266-րդ հովածի 1-ին մասով, այսինքն` իրացնելու նպատակով թմրամիջոցներ, հոգեմետ (հոգեներգործուն) նյութեր ապօրինի պատրաստելը, վերամշակելը, ձեռք բերելը, պահելը, փոխադրելը, առաքելը կամ դրանք ապօրինի իրացնելը և 268 հոդվածի 2-րդ մասի 2-րդ կետով, այսինքն՝  խոշոր չափերով թմրամիջոցների կամ հոգեմետ (հոգեներգործուն) նյութերի ապօրինի շրջանառությունն առանց իրացնելու նպատակի:

Միջադեպի ժամանակ վնասվածքներով Աբովանի բժշկական կենտրոն տեղափոխված Վահրամ Գրիգորյանը ևս նախկինում դատվածություն է ունեցել: Վերջինս այս գործով կալանավորված Վարդան Գրիգորյանի եղբայրն է, այն ավտոտեխսպասարկման կենտրոնի տնօրենը, որտեղ մեքենայի անիվը վերանորոգելու շուրջ վիճաբանություն է առաջացել:

Մենք պարզեցինք, որ Վահրամ Գրիգորյանը նախկինում դատապարտվել է անհրաժեշտ պաշտպանության սահմանազանցմամբ սպանության և անհրաժեշտ պաշտպանության սահմանազանցմամբ ուրիշի առողջությանը ծանր վնաս պատճառելու համար:

Հիշեցնենք՝ հունվարի 28-ի, լույս 29-ի գիշերը Աբովյան քաղաքում գտնվող «Պարտեզ» ռեստորանային համալիրի տարածքում կրակոցներ են հնչել, որի հետևանքով մահացել է մեկ անձ՝ Արտաշես Գևորգյանը: 21-ամյա մի երիտասարդի՝ Ջիվան Հարությունյանի վիճակը ծանր է, վերջինիս վնասվածքները գանգուղեղի շրջանում են:

Ըստ շրջանառվող տեղեկությունների՝ վիճաբանության երկու կողմերում ԱԺ պատգամավոր Գագիկ Ծառուկյանի որդու կողմնակիցներն ու նախկին պատգամավոր Մելիք Մանուկյանի որդին ու այլ ազգականներն են:

Մելիք Մանուկյանի հարազատներից մեկը  այլ անձանց հետ գնացել է Ծառուկյանին պատկանող վուլկանիզացման կետ՝ մեքենայի անիվը փչելու նպատակով, որտեղ վիճաբանություն է սկսվել աշխատակցի հետ: Հետագա իրադարձությունները զարգացել են «Պարտեզ» ռեստորանային համալիրի մոտ, որտեղ Մանուկյանի մի քանի ազգականներ հավաքույթի մասնակցելիս են եղել: