«Արմենիա» բժշկական կենտրոնից փախուստի փորձ կատարած դատապարտյալ Դավիթ Գալստյանն, ով անցնում էր հայտնի «Բանդայի» գործով, ասում է, թե փորձել է փախուստի դիմել, քանի որ անիմաստ է դատապարտվել:

Երևան քաղաքի ընդհանուր իրավասության դատարանում՝ դատավոր Մեսրոպ Մակյանի նախագահությամբ, այսօր կայացավ բժշկական կենտրոնում Գալստյանի մասնակցությամբ տեղի ունեցած միջադեպի գործով դատական նիստ, և դահլիճը լքելուց առաջ, ի պատասխան լրագրողների հարցին, թե ինչո՞ւ էր որոշել փախուստի դիմել, Գալստյանը նման հայտարարություն արեց:

Բժշկական կենտրոնից փախուստի դիմելու փորձը կատարվել է 2017 թվականի հոկտեմբերի 2-ին: Ըստ գործի նյութերի՝ Դավիթ Գալստյանն «Արթիկ» քրեակատարողական հիմնարկից հետազոտության նպատակով տեղափոխվել է «Արմենիա» բժշկական կենտրոն: Ըստ մեղադրանքի՝ Գալստյանն իր մտերիմ Վլադիմիր Մինասյանի օժանդակությամբ, զենքի գործադրմամբ փորձել է փախուստի դիմել, և գտնվելով հիվանդասենյակում՝ հափշտակել է իր պահպանությունն իրականացնող Հարություն Շախպազյանին ամրակցված ատրճանակը, զենքի գործադրմամբ երկու և ավելի անձանց` Արթուր Մարուքյանին, Աշոտ Աշոտյանին, Շախպազյանին սպանելու դիտավորությամբ, հափշտակած ատրճանակից կրակոցներ է արձակել նրանց ուղղությամբ, սակայն իր կամքից անկախ հանգամանքներում հանցագործությունն ավարտին չի հասցրել:

Նշենք, որ ամբաստանյալների փախուստը կանխվել էր ՔՀԿ-ի և բժշկական կենտրոնի աշխատակիցների կողմից: Գալստյանը մեղադրվում է սպանության փորձի, ապօրինի զենք կրելու, հափշտակելու, ազատազրկման վայրից զենքի սպառնալիքով և այլ անձանց կյանքի կամ առողջության համար վտանգավոր բռնություն գործադրելով՝ փախուստի փորձ կատարելու մեջ:

Վլադիմիր Մինասյանը մեղադրվում է վերը նշված արարքին օժանդակելու, սպանության փորձի և ապօրինի զենք կրելու մեջ: 

Մեղադրող դատախազ Պետրոս Պետրոսյանն այսօր հրապարակեց դեպքի վայրի զննության արձանագրությունը:

Զննության ժամանակ գործով տուժողի կարգավիճակ ունեցող ՔՀԿ աշխատակից Արթուր Մարուքյանը հայտնել է, որ դեպքի օրը. երբ ինքը Հարություն Շախպազյանը Աշոտ Աշոտյանը և Դավիթ Գալստյանը հիվանդասենյակում են եղել, այնտեղ է եկել դատապարտյալ Դավիթ Գալստյանին դիմավորած մի երիտասարդ: Ըստ Մարուքյանի՝ երիտասարդի ձեռքին եղել է մեծ պայուսակ, իր հարցադրումը, թե ինչո՞ւ է պայուսակը այդքան մեծ, ի՞նչ կա դրանում, երիտասարդն, ըստ էության, ընդունել է որպես կասկածանք, վազել իրեն ընդառաջ, այդ ընթացքում բացել պայուսակը և այնտեղից հանել ինքնաձիգի փողը: Մարուքյանի պատմածով՝ իրեն հաջողվել է ինքնաձիգի փողը ներքև իջեցնել, որպեսզի երիտասարդն իրենց չսպանի: Այնուամենայնիվ Գալստյանի մտերիմին հաջողվել է ինքնաձիգից մեկ կրակոց արձակել դեպի ներքև, այդ ընթացքում հավանաբար զենքի փողը կպել է պատին և դրա վրա վնասվածք է առաջացել:

Գործով մյուս տուժող Հարություն Շախպազյանը զննության ընթացքում հայտարարել է, որ այս ընթացքում ինքը փորձել է երիտասարդին վնասազերծել և ձեռնաշղթա հագցնել, տեսել է, որ նա գրպանից հանել է կռփազենքը և հարվածել Արթուր Մարուքյանի դեմքին:

Նույն պահին նկատել է, թե ինչպես դատապարտյալ Դավիթ Գալստյանը քաշելով պոկել է իր գոտկատեղին ամրակցված  տաբելային «Մակարով» տեսակի ատրճանակը: Այդ ընթացքում մեծ պայուսակով հիվանդասենյակ եկած երիտասարդը հարվածել է իրենց աշխատակից Աշոտ Աշոտյանի դեմքին:

Այնուհետև, ըստ Շախպազյանի, Դավիթ Գալստյանը պատյանից հանել է իր ատրճանակն, ու երբ ինքը դա տեսել է, փորձել է նրան վնասազերծել, և իրար քաշքշելով՝ հասել են մինչև հիվանդասենյակի մուտքի դռան մոտ: Այստեղ Գալստյանին հաջողվել է լիցքավորել ատրճանակը: Նա, ըստ Շախպազյանի պատմածի, փորձել է իրենց ուղղությամբ կրակել, սակայն Շախպազյանը հասցրել է բռնել ատրճանակից և այն ներքև իջեցրել, ինչի ժամանակ կրակոց է հնչել: Մի քանի վայրկյան տևած քաշքուկի ընթացքում Շախպազյանը փորձել է զենքը խլել Դավիթ Գալստյանից, սակայն վերջինս կարողացել է ևս երեք կրակոց արձակել, որոնք բոլորն էլ դեպի ներքև են եղել, քանի որ ինքը նրա ձեռքն ատրճանակով ներքև է իջեցրել: Ըստ տուժողի՝ այդ ընթացքում Գալստյանը գոռգոռացել է՝ «թողեք պիտի խփեմ, կրակեմ» և նմանատիպ այլ հայտարարություններ արել:

Ըստ Շախպազյանի՝ Աշոտ Աշոտյանն, ով գործով ևս տուժողի կարգավիճակ ունի, օգնության է հասել այն պահին, երբ ինքը Դավիթ Գալստյանի ձեռքին եղած ատրճանակից կարողացել էր դուրս բերել պահունակը, և Գալստյանը, հասկանալով, որ պահունակը հանված է, ատրճանակը գցել է գետնին և փորձել փախչել՝ դռնից կիսով չափ դուրս գալով, ապա Աշոտ Աշոտյանն ու Գալստյանը բռնել են միմյանց հագուստներից, և վերջինս, հագին եղած հագուստը հանելով, փախել է ներքև:

Ըստ տուժող Շախպազյանի՝ ինքն ու Աշոտ Աշոտյանը հետապնդել են Գալստյանին, և հիվանդանոցի անվտանգության աշխատակցի օգնությամբ նրան բռնել առաջին հարկում:

Այստեղ Գալստյանին ձեռնաշղթա են հագցրել, իսկ նրա մտերիմ երիտասարդի ձեռքերը կապել Շախպազյանի գոտիով: Նշենք, որ դեպքի վայրի զննությամբ հայտնաբերվել է խլացուցիչ, պահունակ՝ լիցքավորված փամփուշտներով, կրակած պարկուճներ, կռփազենք, արնանման հետքեր:

Գործում առկա այլ փաստաթղթերի հետազոտումը կշարունակվի հաջորդ դատական նիստին:

Նշենք, որ «Բանդայի գործի» շրջանակներում Գալստյանը դատապարտվել է 15 տարի ժամկետով ազատազրկման: Նա մեղավոր է ճանաչվել «բանդայի» կազմում մի շարք պաշտոնյաների և մեծահարուստների տներից կատարվող ավազակային հարձակման առթիվ հարուցված քրեական գործի շրջանակներում: