Կառավարության երեկվա նիստում վարչապետ Տիգրան Սարգսյանը հայտարարել է, թե այն ընտանիքները, որոնք չեն կարողանում իրենց երեխաներին ապահովել կրթությամբ, ունենաում են աղքատության խնդիր:

«ՉԻ» - Տիգրան Սարգսյանի մտքի փայլատակումները միշտ էլ հիացրել են հայ հասարակությանը, բայց այս անգամ նա ակնհայտորեն գերազացնել է ինքն իրեն: Փաստորեն, նրա կարծիքով մարդիկ աղքատ են, որովհետև չեն կարողանում իրենց երեխաների համար կրթության ապահովել: Իսկ մեզ թվում էր, թե ճիշտ հակառակն է. մարդիկ չեն կարողանում իրենց երեխաների համար կրթություն ապահովել, որովհետև աղքատ են:

Մի խոսքով, վարչապետը հերթական անգամ շփոթել է պատճառն ու հետևանքը: Ըստ այդմ էլ գտել է աղքատության հաղթահարման բանաձևը, որի համաձայն՝ աղքատությունը հաղթահարելու համար մարդը պիտի իր երեխաներին ապահովի կրթությամբ: Այսինքն՝ աղքատությունը կարող են հաղթահարել միայն նրանք, ովքեր աղքատ չեն, որովհետև կրթությունը Հայաստանում բավականին թանկ արժե:

Ի դեպ, հետաքրքիր է՝ ո՞վ է մեղավոր, որ Հայաստանի բուհերում այդպիսի բարձր գներ են սահմանվել: Հիմնական բուհերը, հիշեցնենք, պետական են, վարձավճարներն էլ պետությունն է հաստատում: