Կառավարության այսօրվա նիստին քննարկման էր ներկայացված որոշման նախագիծ, որով առաջարկվում էր թույլատրել մինչև ապրիլի 1-ը Հայաստան ներմուծել աջակողմյան ղեկով այն ավտոմեքենաները, որոնց ձեռք բերման վճարումները կատարվել են մինչև 2018 թվականի դեկտեմբերի 30-ը:

Վարչապետ Նիկոլ Փաշինյանը առարկեց այս առաջարկությանը:

Հարցը զեկուցող տրանսպորտի, կապի և տեղեկատվական տեխնոլոգիաների նախարար Հակոբ Արշակյանին ասաց, որ Այրումի խաչմերուկում պայմանավորվածություն են ունեցել, որ Հայաստան պետք է ներկրվեն միայն այն մեքենաները, որոնք այդ օրվա դրությամբ արդեն գտնվել են մաքսային գոտում: Այսինքն՝ Վրաստանի տարածքից անցել և մտել են մաքսային գոտի:

«Այդ մասով քանի որ չափելիությունը շատ հստակ չենք կարողանում իրականացնել, մենք դրել ենք սահմանափակում գնման ժամկետի վրա», - պարզաբանեց նախարարը:

Վարչապետի գնահատմամբ՝ նման «լղոզված» ձևակերպումներ տալով՝ հարցը չեն լուծում: Ընդգծեց, որ եղել է պայմանավորվածություն, որ vin code-ի (նույնականացման համար) միջոցով մոտ 400 մեքենա պետք է ներմուծվի Հայաստան, և այդ թեմային այլևս երբեք չեն անդրադառնալու:

Արշակյանն ասաց՝ նույնականացման համարի վերահսկման մեխանիզներ չներդնելու, բյուրոկրատական մեխանիզմներ չկիրառելու համար, որոշել էին արդեն գնված մեքենաները ներմուծելու պայման սահմանել։ Վարչապետն ասաց՝  կարող է պարզվի, որ մինչ դեկտեմբերի 30-ը արդեն իսկ գնված 10 000 ավտոմեքենա կա, սակայն իրենք պայմանավորվածություն են ձեռք բերել մոտ 400 ավտոմեքենայի շուրջ. «Ես համաձայն չեմ տենց, որ մի բան պայմանավորվենք, ուրիշ բան անենք: Խոսքը պետք է վերաբերվի այն մեքենաներին, որոնք արդեն գտնվում են մաքսային գոտում: Դա է եղել մեր պայմանավորվածությունը», - նշեց Նիկոլ Փաշինյանը:

Արշակյանը ասաց, որ որոշման նախագիծը կլրամշակեն և կներկայացնեն այն 450 մեքենաների ներկրման համար, որոնք գտնվում են մաքսային գոտում:

Այսօրվա չընդունված որոշման նախագծով՝ տրանսպորտի, կապի և տեղեկատվական տեխնոլոգիաների նախարարությունը առաջարկում էր  թույլատրել Հայաստան ներմուծել աջակողմյան ղեկով այն ավտոմեքենաները, որոնց ձեռք բերելու համար վճարումները կատարվել են ոչ թե մինչև 2018 թվականի հունվարի 25-ը, այլ մինչև 2018 թվականի դեկտեմբերի 30-ը: