Մետաղական հանքերի իրական սեփականատերերը կբացահայտվեն
Կառավարությունն այսօրվա նիստին փոփոխություն կատարեց մի շարք օրենքներում՝ մետաղական հանքաքար արդյունահանող ընկերությունների իրական սեփականատերերին բացահայտելու նպատակով:
Գործադիրի ընդունած որոշումով կսահմանվի հանքերի իրական սեփականատերեր հասկացությունը, ինչպես նաև քաղաքական ազդեցություն ունեցող անձանց շրջանակը:
Նախագծով սահմանվելու են նաև իրավաբանական անձանց, ինչպես նաև իրավաբանական անձ-ֆիզիկական անձ փոխկապակցվածության դեպքերը: Առանձին հոդվածով առանձնացվում է, որ իրական սեփականատիրոջ բացահայտման պարտականություն ունեցող իրավաբանական անձի վերաբերյալ միասնական գրանցամատյանում տեղեկություններ են գրառվելու:
Ընդերքի մասին օրենսգրքում լրացվել են իրական սեփականատերերի վերաբերյալ տեղեկությունների բացահայտման մասին տեղեկանքի ներկայացման պահանջներ, որպես պատասխանատվության միջոց սահմանվել են ընդերքօգտագործման իրավունքի կասեցման և դադարեցման դրույթներ:
Իրական սեփականատերերի փոփոխությունների դեպքում պետք է տեղեկանք ներկայացվի լիազոր մարմնին: Իրական սեփականատերերի վերաբերյալ տեղեկությունների բացահայտման դրույթները նախատեսվում է տարածել ընդերքօգտագործման բոլոր ձևերի վրա:
Նախագծերի մշակման փուլում ուսումնասիրվել են Ղազախստանի, Ղրղզստանի, Ուկրաինայի, Մոնղոլիայի՝ իրական սեփականատերերի բացահայտմանն ուղղված իրավական ակտերը:
Վարչապետ Նիկոլ Փաշինյանն ասաց, որ ամիսներ առաջ տնտեսական մրցակցության պաշտպանության հանձնաժողովից ուսումնասիրություն է ստացել, որ Հայաստանում հանքեր շահագործող ընկերությունների մեծամասնությունը գրանցված է օֆշորային գոտիներում: Ասաց՝ այդ գրությունը պետք է փոխանցվի նաև իրավապահ մարմիններին, որպեսզի ուսումնասիրեն. «Այդ ուսումնասիրությունից տպավորություն էր, որ Հայաստանի հանքերի մեծ մասը կառավարվում է մի կետից, և դա ինքնին տարօրինակ փաստ է: Կարծում եմ, որ արժի՝ իրավապահ մարմինները զբաղվեն դրանով»,- նշեց նա:
Մեկնաբանել