Գեղարքունիքի մարզի Վերին Գետաշեն համայնքի բնակիչները երկրորդ օրն է՝ փակել են Արգիճի գետի վրա «Հիդրոկորպորացիա» ՓԲԸ-ի կառուցած հէկի ջուրը: Այս գետի վրա ընկերությունը 2013-ից շահագործում է համանուն՝ «Արգիճի» փոքր հէկը, որի դրվածքային հզորությունը 9720 Կվտ է: Այն Հայաստանում կառուցված ամենամեծ հէկերի հնգյակում է:

Գյուղացիները պահանջում են իրենց վարչական տարածքում գործող հէկին վճարել համայնքին խոստացված գումարները:

Վերին Գետաշենի համայնքի ղեկավար Տիգրան Մուրադյանը մեզ հետ զրույցում պատմեց, որ 5-րդ օրն է՝ գյուղացիները բողոքի ալիք են բարձրացրել և հէկի գործունեությունը կասեցրել: Տնօրինության հետ հանիպումից հետո էլ՝ երկրորդ օրն է՝ հէկի գլխամասային կայանից գետի հունը խողովակաշարից տեղափոխել են դեպի գետ: Այսինքն՝ 5-րդ օրն է՝ հէկն ամբողջությամբ չի գործում:  

Տիգրան Մուրադյանը փետրվարի 20-ին գրությամբ դիմել է «Հիդրոկորպորացիա» ՓԲԸ-ի տնօրեն Էմիլ Միրզոյանին: Նա իր նամակում նշել է, որ 2015թ. համայնքի վարչական տարածքում բնակիչների թույլտվությամբ ընկերությունը հէկ կառուցեց՝ պայմանով, որ տնօրինությունն իր տարեկան եկամուտներից որոշակի մասնահանումներ կկատարի Վերին Գետաշեն համայնքի զարգացման, համայնքի մանկապարտեզի և անապահով ընտանիքների համար:

Սակայն մինչ օրս ընկերությունը ոչ մի լումա չի հատկացրել այդ խնդիրների լուծմանը: Մինչդեռ կողքի համայնքներում գործող ավելի փոքր հէկերի սեփականատերերը համայնքներին այդ նպատակով տրամադրում են 10 մլն դրամ:

Հիմք ընդունելով համայնքի շուրջ 5000 բնակիչների դժգոհությունները՝ համայնքի ղեկավարը դիմել է «Հիդրոկորպորացիա» ՓԲԸ-ի տնօրինությանը, որ ընկերությունը կատարի իր ստանձնած պարտավորությունը և տարեկան եկամունտներից 50 մլն դրամի չափով գումար փոխանցի Վերին Գետաշանի համայնքապետարանի համապատասխան հաշվեհամարին՝ սկսած 2015թ.-ից: «Հակառակ դեպքում ազգաբնակչությունը թույլ չի տալու, որպեսզի հէկը շարունակի իր հետագա գործունեությունը»,- նամակում նշել է համայնքապետը:

Նամակից հետո համայնքի ղեկավարը մի քանի բնակիչների հետ հանդիպել է հէկի տնօրեն Էմիլ Միրզոյանին, սակայն որևէ կառուցողական մոտեցում կամ դրական առաջարկ չի ստացել տնօրինությունից:

Գյուղապետը պատմեց, որ հէկի գործունեության դեմ դժգոհությունները տարիների ընթացքում կուտակված խնդրիների հետևանք  են: Խողովակաշարերն անցկացնելու և դրանք երկու անգամ պայթելու հետևանքով 8 ընտանիքի սեփականությամբ պատկանող տնամերձ հողատարածքները մեծ վնասներ են կրել և պատշաճ փոխհատուցում չեն ստացել: Մի մասը դատական կարգով է փորձել փոխհատուցում ստանալ, մյուս մասը՝ սերվիտուտի պայմանագիր է կնքել, երրորդ խումբն էլ՝ ոչ մի փոխհատուցում չի ստացել:

«Մյուս համայնքներում փորձեր կան, որ որոշակի սոցիալական ծրագրեր են իրականացնում, բայց «Հիդրոկորպորացիա»-ի կողմից մեր համայնքում որևէ ներդրում կամ սոցիալական ծրագիր չի իրականացվել»,- ասում է համայնքի ղեկավարը:

Ընկերությունը տարեկան 5000 դրամ գույքահարկ է վճարում համայնքապետարանին, 150 հազար դրամ էլ՝ հողի հարկ: Վերջին երկու տարին որևէ վճարում չի կատարել համայնքի բյուջե: Հարևան Մադինային ևս պարտքեր ունի:  

Գյուղապետն ասաց, որ առայժմ գետի ջուրը չի ուղղվելու դեպի հէկի խողովակաշարը: Իսկ մինչ այդ համայնքի բնակիչներն ու համայնքապետը կսպասեն Տարածքային կառավարման նախարարության և մարզպետարանի պատասխաններին: Գյուղի բնակիչների պահանջներն այս գերատեսչություններին է ուղղվել, որտեղից 2 օրվա ընթացքում խոստացել են լուծում տալ:

Վերականգնվող էներգիա արտադրողների ասոցիացիան դատապարտել է Վերին Գետաշենի բնակիչների այս արարքները: Միաժամանակ հայտնել է, որ ընկերությունն արդեն նյութեր է պատրաստել և դիմել է իրավապահներին՝ ոստիկանությանն ու դատախազությանը՝ քրեական գործ հարուցելու պահանջով: 

Ընկերության հետ առայժմ կապ հաստատել չհաջողվեց, սակայն առաջիկայում կփորձենք պարզաբանումներ ստանալ նաև «Հիդրոկորպորացիա» ՓԲԸ-ի տնօրինությունից: 

Լուսանկարում՝ Տիգրան Մուրադյանը