Շիրակի նորանշանակ մարզպետ Տիգրան Պետրոսյանը փետրվարի 25-ին ընդունել է փետրվարի 17-ին ՏԻՄ ընտրությունների արդյունքում վերընտրված Հառիճի համայնքապետ Ռոլանդ Նազարեթյանին եւ Աշոցք խոշորացված համայնքի համայնքապետ Կարեն Մանուկյանին: Շնորհավորանքից եւ առաջիկա գործունեության շուրջ զրույցից զատ, անդրադարձ է եղել նաեւ նախընտրական շրջանում թեկնածու Կարեն Մանուկյանի՝ որպես համայնքի ղեկավարի պաշտոնակատար ընդունած որոշումներին:

Քարոզարշավին մասնակցելու նպատակով փետրվարի 5-ից 15-ը Կարեն Մանուկյանն ինքն իրեն չվճարվող արձակուրդ էր ուղարկել՝ համայնքապետի պարտականությունները ժամանակավորապես փոխանցելով համայնքապետի տեղակալ Կարեն Աբրեյանին: Սակայն Աշոցք համայնքի պաշտոնական կայքում տեղ գտած որոշումներն այլ բան են ասում: Պարզվում է, որ Կարեն Մանուկյանը, փաստացի գտնվելով արձակուրդում, որպես համայնքի ղեկավար, կայացրել է 9 որոշում, որից միայն 4-ը՝ փետրվարի 11-ին:

Թիվ 33 որոշմամբ՝ ընդունած 2019թ-ի փետրվարի 11-ին Կարեն Մանուկյանը, ղեկավարվելով ՏԻՄ օրենքի 45-րդ հոդվածի 1-ին մասի 2-րդ կետի եւ Աշոցք համայնքի ավագանու 2018թ. դեկտեմբերի 24-ի թիվ 45-Ն որոշման հավելվածի 7-րդ կետի 1-ին, 2-րդ ենթակետի «ա» պարբերությամբ, անհատ ձեռնարկատեր Հայկուշ Եղոյանին 2019թ-ի 1-ին եռամսյակի համար ոգելից խմիչքների, ծխախոտի արտադրանքի վաճառքի թույլտվություն է տվել: Նույն օրը կայացրած նմանատիպ թիվ 34 որոշմամբ ոգելից խմիչքների, ծխախոտի արտադրանքի վաճառքի թույլտվություն է տրվել անհատ ձեռնարկատեր Սասուն Քոթանջյանին 2019թ-ի 1-ին եւ 2-րդ եռամսյակների համար:

Փետրվարի 11-ը արձակուրդում գտնվող եւ քարոզարշավ իրականացնող թեկնածուի համար առատ է եղել որոշումներ կայացնելու առումով: Ղեկավարվելով «Տեղական ինքնակառավարման մասին» օրենքի 35-րդ հոդվածի 1-ին մասի 24-րդ կետի, քաղ. օրենսգրքի 188-րդ հոդվածի 2-րդ մասի, ՀՀ կառավարության 2006 թվականի մայիսի 18-ի N 731-Ն որոշմամբ հաստատված  2-րդ, 3-րդ կետերի, կառավարության 2006 թվականի մայիսի 18-ի N 912-Ն որոշման 3-րդ կետի, նույն որոշմամբ հաստատված կարգի 33-րդ կետերի դրույթներով և հաշվի առնելով, որ Աշոցք համայնքում (բնակավայր` Սիզավետ) կառուցված խանութի շենքը համապատասխանում է քաղաքացիական օրենսգրքի 188-րդ հոդվածի 5-րդ մասով սահմանված օրինականացման պայմաններին որոշել է Սիզավետ գյուղում ինքնակամ զբաղեցրած 0,02498 հեկտար բնակավայրերի նպատակային նշանակության հողամասի վրա ինքնակամ կառուցված 68 քառակուսի մետր արտաքին մակերեսով խանութի շենքը ճանաչել օրինական:

Կարեն Մանուկյանը

Այնուհետեւ, արդեն որպես Աշոցք համայնքի սեփականություն, նույն հողամասի գործառնական նշանակությունը համարելով փոփոխված՝ Կարեն Մանուկյանի որոշմամբ այն ընդգրկվել է հասարակական կառուցապատման գործառնական նշանակության հողերի կազմում, այնուհետեւ՝ նախապատվության իրավունքով՝ ուղղակի վաճառքով, տրամադրելու առաջարկ է արվել տվյալ կառույցը իրականացրած քաղաքացի Սասուն Հենրիկի Քոթանջյանին:

Եվս մեկ որոշում համայնքապետի թեկնածու Կարեն Մանուկյանը կայացրել է փետրվարի 15-ին, այսինքն արձակուրդի ավարտին եւ բուն ընտրությունից 2 օր առաջ: Թիվ 37 որոշմամբ «Ասգանաս Բերնեցյան» ՍՊԸ-ին՝ (իրավաբանական հասցեն՝ Գյումրի, Շինարարների փողոց 33) Մեծ Սեպասար բնակավայրում սեղմված բնական գազի վաճառքի թույլտվություն է տվել:

«Հետք»-ի տեղեկություններով՝ մարզպետ Տիգրան Պետրոսյանն առաջարկել է Կարեն Մանուկյանին անվավեր ճանաչել արձակուրդում եղած ժամանակահատվածում կայացրած որոշումները՝ համարելով, որ դրանք պետք է վերանայվեն: