Երևան քաղաքի ընդհանուր իրավասության դատարանում՝ նախագահությամբ դատավոր Վարդան Գրիգորյանի, այսօր քննվում էր բնապահպանության նախկին նախարար Արամ Հարությունյանի և գործով անցնող մյուս անձանց վերաբերյալ քրեական գործը վերաբացելու վերաբերյալ բողոքի քննությունը: Նիստի օրվա և ժամի մասին ծանուցվել էր նաև գործարար Սիլվա Համբարձումյանը, որը, ըստ գործի նյութերի, կաշառք է տվել Արամ Հարությունյանին:

Համբարձումյանը, սակայն, նիստին չէր ներկայացել: Կաշառքի և փողերի լվացման գործը քննող քննիչ Դավիթ Կոստանդյանը դատարանին միջնորդեց ևս մեկ անգամ Համբարձումյանին ծանուցել նիստին ներկայանալու մասին, և դատավորը բավարարեց միջնորդությունը:

Նշենք, որ Հարությունյանի վերաբերյալ գործը քննվում է 2015 թվականից, սակայն դրա վարույթը կարճվել է, ապա Հայաստանում տեղի ունեցած իշխանափոխությունից հետո նորից վերաբացվել՝ նոր երևան եկած հանգամանքի հիմքով:

Կարճված քրեական գործով անցել են մի քանի անձինք, որոնք ևս վիճարկում են գործի վերաբացման որոշումը:

Այլ մանրամասներ՝ ավելի ուշ: