HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Open Stage. նոր թատերական հարթակ երիտասարդ ստեղծագործողների համար

Հայ թատերաբեմը վերջերս ծանոթացավ երիտասարդ ստեղծագործողների ջանքերով ստեղծված Open Stage նախագծին, որի նպատակն է երիտասարդներին հնարավորություն ընձեռել իրենց աշխատանքները ներկայացնել հանրությանը: Ներկայացումները չունեն ո՛չ ժանրային, ո՛չ էլ տարիքային սահմանափակում: Թատրոնի առաձնահատկությունն այն է, որ այստեղ դերասանական կազմի փոխարեն՝ գործում է ռեժիսորական կազմ, որն էլ ներկայացումների համար ընտրում է դերասաններ:

«Մենք փորձում ենք մեր նոր խոսքն ասել թատերական իրականության մեջ: Ուստի ընտրված պիեսներն ավելի քիչ են բեմադրված: Ունենք նաև ժամանակակից ստեղծագործողների գործեր»,- ասում է թատրոնի գեղարվեստական ղեկավար Ալեքսանդր Գաբրիելյանը:

Open Stage երիտասարդական թատրոնի ներկայացումների նախապատրաստական աշխատանքները սկսվել են 2018 թվականի ամռանը:

Առաջին ներկայացումը «Թթվածին» մոնոդրաման է՝ բեմադրված Իվան Վիռիպաևի համանուն պիեսի մոտիվներով: Մոնոդրամայի դերակատարը Դավիթ Աբրահամյանն է, ռեժիսորը՝ Նադեժդա Իսրայելյանը: Պրեմիերան տեղի է ունեցել 2018 թվականի սեպտեմբերի 24-ին: «Թթվածինը» մասնակցել է նաև «Արմմոնո+» փառատոնին և շուտով կներկայացվի Մոսկվայում:

Հաջորդը «Եվգենի Օնեգին» (Ա. Ս. Պուշկինի համանուն չափածո վեպի հիման վրա) պարային ներկայացումն է: Ռեժիսորը՝ Գաբրիել Խուդեդան, ավարտել է պարուսույց, ՀԽՍՀ ժողովրդական արտիստ Վիլեն Գալստյանի կուրսը: Այս պարային ներկայացումը եղել է նրա դիպլոմային աշխատանքը, այնուհետև ընդգրկվել է Open Stage-ի խաղացանկում:

Թատերախումբը շուտով պրեմիերաներ է ունենալու, որոնցից մեկը «Շերլոկ Հոլմս» (Ա. Կ. Դոյլի «Կարմրահերների միություն» պատմվածքի հիման վրա) ներկայացումն է, որն առաջին անգամ է բեմադրվելու հայ թատերասեր հանրության համար (ռեժիսոր՝ Յուրա Կիրակոսյան):

Երիտասարդական թատրոնը ներկայացումներ է կազմակերպում նաև մարզերում՝ այնտեղ թատերական մշակույթը զարգացնելու համար: Թատերախումբն արդեն հասցրել է հանդես գալ Գյումրիում, ինչպես նաև Արցախում՝ Բերձորում: Հանդիսատեսը դրականորեն է արձագանքել երիտասարդների նախաձեռնությանը: Թատրոնի գեղարվեստական ղեկավար Ալեքսանդր Գաբրիելյանն ասում է, որ իրենց անկեղծությամբ են փորձում հանդիսատեսին գրավել:

Առաջին լուսանկարում՝ դրվագ «Եվգենի Օնեգին» պարային ներկայացումից
Լուսանկարները՝  Open Stage-ի և դերասանների ֆեյսբուքյան էջերից

Հեղինակ՝ Հռիփսիմե Հայրապետյան, Վ. Բրյուսովի անվան պետական լեզվահասարակագիտական համալսարանի 4-րդ կուրսի ուսանող

 

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։