HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գրիշա Բալասանյան

Էջմիածնի ճանապարհները դառնում են անանցանելի

Էջմիածնի ճանապարհներին օրեցօր ավելանում են փոսերը, իսկ վերանորոգման աշխատանքներ այդպես էլ չեն կատարվում: Ընդամենն օրեր առաջ կենտրոնական ճանապարհների մեծ փոսերի մի մասն է լցվել, սակայն դրանից իրավիճակը չի փոխվել: Փոսերը շրջանցելու համար երբեմն ավտոմեքենաները հայտնվում են հանդիպակաց ճանապարհահատվածում, ինչը լուրջ վթարային իրավիճակ է ստեղծում:

«Էս ճանապարհներն եք ուզում սարքե՞լ: Մաղարիչ կանեմ, մենակ թե օր առաջ սարքեք: Ավտոները փոսերից փախցնելով՝ արդեն մայթերով են քշում»,- այսպես դիմեց քաղաքի Թումանյան փողոցի բնակիչներից մեկը՝ տեսնելով լուսանկարչական ապարատը: Նա մեզ շփոթեց քաղաքապետարանի աշխատակցի հետ և պատրաստ էր նույնիսկ «մաղարիչ» անել գյուղերը Էջմիածնին կապող գլխավոր այդ ճանապարհը վերանորոգելու համար:

Նույն վիճակում է գտնվում նաև քաղաքի Պետրոզավոդսկ փողոցը և նմանատիպ շատ փողոցներ: Իսկ Արարատյան փողոցի մայթերն այնքան են քանդվել, որ մարդիկ նախընտրում են փողոցով քայլել, քան դուրս գալ մայթ:

Էջմիածնի քաղաքապետարանի լրատվական բաժնից «Հետք»-ին փոխանցեցին, որ ասֆալտապատման աշխատանքներ սկսելու համար եղանակային պայմանները դեռ նպաստավոր չեն:

«Էջմիածնի քաղաքային իշխանության մարտավարությունն է` անել հետզհետե, քայլ առ քայլ, բայց կապիտալ և որակով, ինչը կծառայի երկար և չի պահանջի նոր ներդրումներ: Միևնույն ժամանակ հայտնում ենք, որ անհրաժեշտությունից ելնելով՝ մինչ բուն ասֆալտապատման աշխատանքների մեկնարկը Էջմիածնի մի շարք փողոցներում կատարվել են խոր փոսերի ժամանակավոր փոսալցման աշխատանքներ»,- ասված է լրատվական ծառայության պատասխանում:

Ըստ քաղաքապետարանի՝ փոսալցումը կատարվել է համայնքապետարանի «Բարեկարգում տնօրինություն» ընկերության ուժերով, անհրաժեշտ տեխնիկան ժամանակավոր անհատույց օգտագործմամբ տրամադրել է Ստեփան Մուրադյան ԱՁ-ն: Ձեռք է բերվել միայն ասֆալտը` քիչ քանակությամբ: Ասֆալտը գնվել է «Շին պլյուս» ՍՊԸ-ից, և գնումը չի գերազանցել 1 մլն դրամը:

«Ավելի ուշ` եղանակային նպաստավոր պայմանների առկայությամբ կմեկնարկեն ասֆալտապատման հիմնական աշխատանքները: Այս պահին ընթացքի մեջ են փողոցների գույքագրման աշխատանքները: Ասֆալտապատման աշխատանքների համար մրցույթ դեռ հայտարարված չէ»,- տեղեկացնում են քաղաքապետարանից:

Նշենք, որ Էջմիածին համայնքն օգտվելու է կառավարության կողմից իրականացվող սուբվենցիոն ծրագրից, որի պարագայում կատարվող հիմնանորոգման համար պետությունը տրամադրելու է 45 % համաֆինանսավորում, իսկ 55 %-ը ներդրվելու է համայնքի միջոցներից:

Հիշեցնենք, որ Էջմիածին քաղաքում 2016-2018թթ. հունիս ամիսին (այդ ժամանակ է լիազորությունները վաղաժամկետ դադարեցնելու դիմում ներկայացրել Էջմիածնի քաղաքապետ Կարեն Գրիգորյանը) ճանապարհաշինական աշխատանքները կատարվել են միայն «Կուարլինի» ՍՊԸ-ի կողմից: Ընկերության 100 % բաժնետերը արդեն նախկին քաղաքապետ Կարեն Գրիգորյանի հայրն է՝ ԱԺ պատգամավոր Մանվել Գրիգորյանը: Միայն նշված ժամանակահատվածում համայնքային բյուջեից քաղաքապետի հոր ընկերությանը վճարվել էր մոտ 287 մլն դրամ:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։