Արդեն տեղեկացրել էինք, որ այսօր վաղ առավոտից Արմավիրի մարզի Զարթոնք համայնքի մի քանի տասնյակ բնակիչներ բողոքի ակցիա էին իրականացնում համայնքապետարանի դիմաց՝ պահանջելով համայնքապետ Պարույր Սահակյանի հրաժարականը: Վերջինս համայնքը ղեկավարում է արդեն 23 տարի՝ 1996 թվականից:

Սուրեն Պողոսյան

«Քառօրյայի փող ուտողը, անապահով ընտանիքների փող ուտողը, մահացած անձանց անվան տակ դուրս գրած փողերը յուրացնողը մեր հասարակությունում ընդհանրապես տեղ չունի, ուր մնաց համայնքապետ աշխատի: Ես դուրս եմ եկել իրա դեմ հենց նման բաների համար»,- ասում է բողոքի ակցիայի մասնակիցներից Սուրեն Պողոսյանը:

Ըստ նրա՝ իրենք ունեն փաստեր: Նշեց նաև, որ անապահով ընտանիքների անվան տակ օգնություն է հատկացվել մարդկանց, ովքեր դրա կարիքը չունեն, իսկ օրվա հացի «կարոտներին» ոչ մի օգնություն չի հատկացրել:

Քյամալ Հասոյան

«Գյուղապետարանի աշխատակից Քյարամ Աջոյանը փորձում ա համոզի, ստիպի, որ ես  ասեմ, թե այդ փողը ստացել եմ: Ես իրանց բազմիցս զգուշացրել եմ, որ նման բան չեմ ասելու: Ով այդ փողը ստացել է, յուրացրել է, ինքն էլ պատասխան է տալու: 2017թ. վերջին 100,000-ական դրամ է հատկացվել իբր ինձ ու իմ հորեղբոր որդուն, բայց մենք գումար չենք ստացել, այդ մասին նոր ենք իմացել»,- ասում է բողոքի ակցիայի մեկ այլ մասնակից` Քյամալ Հասոյանը:

Սուրեն Պողոսյանը հերթով թվարկում է այն գյուղացիների անունները, ովքեր իբր անապահով են և սոցօգնություն են ստացել, սակայն իրականում այդ գումարի կարիքը չունեն:

«Ուսոյան Մշիր Մոսկովի` 100 հազար դրամ, գնացեք Մշիրի տունը, դռան դիմաց 40 հազար դոլարանոց ջիփ ա կանգնած: Թղթերը շատ են»,- ասում է Սուրենը: Նրա խոսքերով՝ համայնքապետի թոռները, հարսը ևս օգնություններ են ստացել: Պատմեցին նաև, որ համայնքային բյուջեից վճարվել են նաև համայնքապետի երեք թոռների, փեսայի և հարսի ուսման վարձերը: Իսկ թոռներից մեկն աշխատում է համայնքապետարանում, համայնքապետ պապի օգնականն է:

Արարատ Ղազարյանի եղբայրն էլ՝ Կարենը, նշեց, որ եղբոր կնոջ մահվան պատրվակով 180,000 դրամ գումար է դուրս գրվել, սակայն իրականում իրենք տեղյակ են 90,000 դրամից: «Այդ փողն էլ պարտքի տեղ ա վերցրել գյուղապետը, ասել ա՝ խանութում մի անգամ 50,000 եմ տվել, մի անգամ էլ` 40,000 դրամ, պիտի այդ փողը հետ բերեմ, թե չէ»,- ասում է Կարենը:

Կարեն Ղազարյան

Սուրեն Պողոսյանն ասում է, որ թեև որոշումները կայացրել ա ավագանին, սակայն իրականում որոշողը եղել է համայնքապետը: Ըստ նրա՝ եղել են դեպքեր, երբ ավագանու անդամը չի իմացել, թե ինչի տակ է ստորագրում:

Զարթոնքի համայնքապետ Պարույր Սարգսյանը չի ընդունում համագյուղացիների մեղադրանքները: Ասում է, որ օգնությունները հատկացվել են դիմումների հիման վրա, և ինքն անհրաժեշտության դեպքում իրավապահ մարմիններին կներկայացնի այդ հիմքերը: Ավելին, նշում է, որ չի պատրաստվում լիազորությունները վաղաժամկետ դադարեցնելու դիմում գրել, քանի որ եթե բողոքողները մի քանի տասնյակ են, ապա իր ընտրողների թիվը մոտ 1000 է:

«Այո, իմ թոռներին օգնություն տրվել է: Երկուսն էլ ծնողազուրկ երեխեք են, տրվել է: Մյուս ծնողազուրկ երեխեքին հասնում է, իմ թոռներին չի՞ հասնում: Ավագանին է տվել, ես ինչ իրավունք ունեմ»,- ասում է համայնքապետը:

Պարույր Սարգսյան

Ինչ վերաբերում է ապրիլյան ազատամարտի մասնակիցների անուններով դուրս գրված գումարներին, համայնքապետը հերքեց: Ասում է, որ այդ ժամանակ առաջինն ինքն է այցելել հոսպիտալներում պառկած համագյուղացիներին, այդ ժամանակ փոքր ֆինանսական օգնություն է հատկացրել, իսկ հետո, ծնողների դիմումների հիման վրա, 3 վիրավորներին հատկացրել է 150,000-ական դրամ:

«Ինչ վերաբերում է Կարենի եղբոր կնոջ մահվան դեպքով գումարի հատկացմանը, այո, 180,000 դրամ հատկացվել է, դա կհաստատի հենց Կարենի եղբայրը: Բայց իրականում քիչ-քիչ ավելի շատ գումար եմ տվել: Ինչ եք կարծում՝ ես հիվանդ մարդկանց փողերը պիտի ուտե՞ի»,- ասում է Պ. Սարգսյանը:

Գյուղացիները հայտնեցին, որ պայքարելու են այնքան, մինչև համայնքապետը լիազորությունները դադարեցնելու դիմում գրի: