Կենտրոն և Նորք-Մարաշ վարչական շրջանի դատարանի դատավոր Արայիկ Մելքումյանը Բելլա և Սեդրակ Քոչարյաններն ընդդեմ «Ժամանակ» օրաթերթի հրատարակիչ «Սկիզբ մեդիա կենտրոն» ՍՊԸ-ի դատական հայցի վերաբերյալ սպասված վճռի փոխարեն մայիսի 5-ին հրապարակեց որոշում դատաքննությունների վերսկսման մասին` առանց նշելու հիմքերը: 

Հիշեցնենք, որ Քոչարյանները «Ժամանակ» օրաթերթից  պահանջում են թերթում նախորդ տարի տպագրված 3 հոդվածների հերքում և 6 մլն դրամի փոխհատուցում, որից 3 մլն-ը` դատական ծախսերի, իսկ մնացածը բարոյական վնասի փոխհատուցման համար։

Ըստ «Ժամանակ» օրաթերթի շահերի պաշտպան Նիկոլայ Բաղդասարյանի` դատավորի կայացրած որոշումը քաղաքական է: Փաստաբանը գտնում է, որ հնարավոր է` դատավորն ինքը չի կողմնորոշվել վճռի հարցում և ժամանակ է ձգում` տեսնելու, թե ինչ կողմնորոշում ունեն լրատվամիջոցների ներգրավմամբ մյուս գործերը քննող դատավորները, կամ էլ սպասում է «վերևից եկող» հրահանգի: 

Փաստաբանը մատնանշում է նաև, որ հայցը օրենքով սահմանված ժամկետում չի ներկայացվել, և դատարանը գործը վաղուց կարճած կլիներ, եթե ներգրավված անձինք լինեին շարքային քաղաքացիներ: Բաղդասարյանը չի բացառում հայցի մասնակի բավարարում` ցույց տալու համար, որ իբր ընդառաջ են գնում լրատվամիջոցին:

Բաղդասարյանը շեշտեց նաև, որ լրատվամիջոցը պատրաստ է ներողություն խնդրել և հերքել տեղեկատվությունների այն մասը, որը չի համապատասխանում իրականությանը, պայմանով, որ Քոչարյանները ցույց տան, թե կոնկրետ որ տեղեկությունն է սխալ: Սակայն Քոչարյանները համառորեն հրաժարվում են վեճի ոչ դատական լուծումից:

Հաջորդ դատական նիստը կկայանա մայիսի 20-ին: