Խորհրդարանն առաջին ընթերցմամբ ընդունեց «Հանրային ծառայության մասին» օրենքի նախագծում փոփոխություններ կատարելու մասին նախագիծը։ Այն ընդունվեց միաձայն՝ 113 կողմ ձայնով։ Ըստ այս փոփոխության՝ հայտարարատու պաշտոնատար անձինք և նրանց ընտանիքի կազմի մեջ մտնող անձինք 2018 թվականի տարեկան հայտարարագիրը Բարձրաստիճան պաշտոնատար անձանց էթիկայի հանձնաժողով են ներկայացնելու մինչև 2019 թվականի մայիսի 31-ը:

Հիշեցնենք, որ 2017-ին խորհրդարանն ընդունել էր «Կոռուպցիայի կանխարգելման հանձնաժողով ստեղծելու մասին» օրենք, որի համաձայն` հանձնաժողովը պետք է ստեղծվեր 2018-ի ընթացքում և գործեր այս տարվա հունվարի 1-ից, սակայն հանձնաժողով այդպես էլ չստեղծվեց։

Նախագիծը ներկայացրեց արդարադատության փոխնախարար Սուրեն Քրմոյանը: «Հիմա ունենք իրավիճակ, երբ փաստացի այս հանձնաժողովը չի ստեղծվել, ընդ որում հանձնաժողովի չստեղծմամբ խոչընդոտներ են առաջացել գույքի և եկամուտների հայտարարագրման հետ կապված. օրենքով հստակ ամրագրված է պահանջ, որ հայտարարատու պաշտոնատար անձինք ներկայացնեն հայտարագրեր, միևնույն ժամանակ չկա այն մարմինը, որտեղ պետք է ներկայացվի այդ հայտարարագիրը, քանի որ այս տարվանից պետք է ներկայացվեին կոռուպցիայի կանխարգելման հանձնաժողով, որը չի ստեղծվել»,- ասաց նա։

Կառավարությունն առաջարկում է երկարաձգել նաև կոռուպցիայի կանխարգելման հանձնաժողով ստեղծելու որոշումը, որպեսզի 2020 թվականի հունվարի 1-ից հայտարարագրման նոր մեխանիզմ ներդրվի։

Հիշեցնենք, որ բարձրաստիճան պաշտոնատար անձանց էթիկայի հանձնաժողովի նախագահ Սիրանուշ Սահակյանը այս տարվա փետրվարի 5-ին հենց այս պատճառով է դադարեցրել իր պաշտոնավարումը, քանի որ այս տարվա հունվարի 1-ից պետք է գործեր հայտարարագրման նոր կարգ, ինչը չեղավ։

Խորհրդարանը վաղը երկրորդ ընթերցմամբ նախ կքննարկի հարցը, ապա այն կդրվի քվեարկության։