Կավելանա Երևանում գործող 10 հատուկ դպրոցների ֆինանսավորումը
Կառավարությունն այսօրվա նիստին որոշեց ավելացնել Երևանում գործող 10 հատուկ դպրոցների ֆինանսավորումը:
Ինչպես նշվում է կրթության և գիտության նախարարության ներկայացված որոշման նախագծում, 2018 թվականի ընթացքում նախատեսվում էր Երևանում առնվազն 4 տարածքային մանկավարժահոգեբանական աջակցության կենտրոններ հիմնադրել՝ կրթության և գիտության նախարարության ենթակայության հատուկ դպրոցների վերակազմակերպման միջոցով:
Այդ իսկ պատճառով 2019 թվականի պետական բյուջեով նախատեսվել է Երևանում այժմ գործող 10 հատուկ դպրոցի փոխարեն 5 հատուկ դպրոցի և 5 աջակցության կենտրոնի ֆինանսավորում: Սակայն հաշվի առնելով այն հանգամանքը, որ այդ հատուկ դպրոցների վերակազմակերպումը հնարավոր է իրականացնել ուսումնական տարվա ավարտից հետո՝ ԿԳՆ առաջարկում է ավելացնել ներկայում գործող հատուկ դպրոցների ֆինանսավարումը:
Բացի այդ, այժմ ստեղծվել է միջգերատեսչական աշխատանքային խումբ, որն ուսումնասիրում և իրականացնում է քննարկումներ վերակազմակերպվող հատուկ դպրոցների ընտրության, այնտեղ սովորող սաների հետագա կրթության կազմակերպման համար:
Այժմ նախարարությունը նպատակ ունի ներկայումս գործող 10 հատուկ դպրոցի ֆինանսավորումը ավելացնել:
Նախարարությունն առաջարկում է ավելացնել ներկայում գործող 10 հատուկ դպրոցի ֆինանսավորումը (2019 թվականի 1-ին կիսամյակի ընթացքում)՝ աջակցության կենտրոնների ֆինանսավորման համար 2019 թվականի պետական բյուջեով նախատեսված միջոցների, ինչպես նաև հատուկ դպրոցի համար 2019 թվականի 2-րդ կիսամյակի համար նախատեսված միջոցների հաշվին:
Մեկնաբանել