Երևան քաղաքի ընդհանուր իրավասության դատարանը՝ նախագահությամբ դատավոր Աննա Մաթևոսյանի, հրապարակեց որոշում, որով մերժեց պատգամավորների երաշխավորությամբ կալանքից ազատել կաշառք ստանալու մեջ մեղադրվող Թաթուլ Շուշանյանին: Վերջինս Քննչական կոմիտեի Լուռու մարզային քննչական վարչության նախկին պետն է:

Շուշանյանի համար գրավոր երաշխավորություն էին տվել ԲՀԿ խմբակցության 6 պատգամավոր, որոնցից երեքը՝ Գևորգ Պետրոսյանը, Արայիկ Աղաբաբյանն ու Սերգեյ Բագրատյանը երեկ տեղի ունեցած նիստին եկել էին դատարան:

Հիշեցնենք, որ ըստ մեղադրանքի՝ Թաթուլ Շուշանյանը, զբաղեցնելով Քննչական կոմիտեի Լոռու մարզային քննչական վարչության պետի պաշտոնը, ունենալով արդարադատության գնդապետի կոչում, հանդիսանալով պետական հատուկ ծառայություն և իշխանության ներկայացուցչի գործառույթներ մշտապես իրականացնող պաշտոնատար անձ, Վլադիմիր Դավթյանի և Վահագն Աբգարյանի օգտին իր լիազորությունների շրջանակում ակնհայտ ապօրինի գործողություններ կատարելու և անգործություն դրսևորելու համար Վահագն Աբգարյանից պահանջել և անձամբ ստացել է առանձնապես խոշոր չափերով կաշառք, ինչպես նաև չարաշահել է իր պաշտոնեական լիազորությունները:

Կաշառքն, ըստ գործի նյութերի, տրվել է Կամո Փիրուզյանի գործի շրջանակներում: