HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արվեստ` ստեղծված նոր մեդիայի աշխարհում

Տարբեր ժամանակներում մարդու երևակայությունը փորձել է գտնել արվեստը մարդկանց ներկայացնելու առավել գեղեցիկ և հետաքրքիր միջոցները: Նոր տեխնոլոգիաների ի հայտ գալը նույնպես իր ազդեցությունն է ունեցել արվեստի վրա՝ ձևավորելով արվեստի մի նոր տեսակ, որն անվանում են Նոր մեդիա արվեստ: Չնայած նրան, որ այս տերմինը հստակ սահմանում չունի, այն կապում են նոր մեդիայի հետ, որն օգնում է թվային տեխնոլոգիաների միջոցով նորովի մատուցել արվեստի գործերը՝ դրանք դարձնելով առավել շոշափելի և ազդեցիկ:

Ներկայումս Նոր մեդիա արվեստը իր զարգացման շարունակական գործընթացում է, սակայն այս պահին սահմանված են հետևալ կատեգորիաները՝

Net art / Նեթ-արտ կամ Ինտերնետային արվեստ

1990-ականներին ձևավորված համացանցը արմատապես փոխեց թե՛ հաղորդակցության ոլորտը, թե՛ նոր հնարավորություններ ստեղծեց արվեստագետների համար: Net art տերմինի ի հայտ գալը կապվում է ժամանակակից սլովենացի նկարիչ Վուկ Լոսիչի հետ, որն իր աշխատանքները ստեղծելու համար կիրառում էր ASCII (American Standard Code for Information Interchange/Տեղեկատվության փոխանակման ամերիկյան ստանդարտ կոդ) ծածկագրերը:

Ինտերնետային արվեստին պատկանող աշխատանքները կարող են ցուցադրվել ոչ միայն առցանց հարթակում, այլև պատկերասրահներում՝ չպահանջելով համացանցի կիրառություն:

Virtual art / Վիրտուալ արվեստ

1980-ականների սկզբին ամերիկացի գիտնական Ջարոն Լանյեն սկսեց կիրառել Virtual reality / Վիրտուալ իրականություն տերմինը: Վիրտուալ իրականությունը հնարավորություն է ընձեռում հայտնվել անիրական միջավայրում, որի հետ շփումը ապահովում են թվային էկրանները կամ ստերեոսկոպիկ ակնոցները: Կան նաև հատուկ ձեռնոցներ, որոնց միջոցով մարդիկ կարողանում են ուղղակիորեն փոխազդել այդ մտացածին միջավայրի հետ, օրինակ՝ նկարել այնտեղ: 

Robotic art / Ռոբոտային արվեստ

1960-ականներին արվեստում առաջին անգամ սկսեցին օգտագործել ռոբոտներ և այլ ավտոմացված տեխնոլոգիաներ՝ զուգակցելով դրանք համակարգչային տեխնոլոգիաների և սենսորների հետ: Այստեղ ռոբոտները ներկայացվում են որպես արվեստի գործեր: Սակայն, ի տարբերություն, օրինակ՝ քանդակների կամ նկարների, դրանք առավել լայն հնարավորություններով են օժտված: Կան նույնիսկ հատուկ մշակված ռոբոտներ, որոնք իրենք են ստեղծում արվեստի գործեր:

Artifical life art / Արհեստական կյանքի ձևեր պարունակող արվեստ

Այստեղ օգտագործվում են գենետիկական ինժեներիան և բիոինժեներիան՝ արվեստի գործեր ստեղծելու համար: Այդպիսի ստեղծագործությունների առանձնահատկությունն այն է, որ դրանք ժամանակի ընթացքում կարող են ենթարկվել մուտացիայի և զարգանալ՝ փոփոխելով իրենց կենսակերպը:

Digital art / Թվային արվեստ

Այս կատեգորիայում կարող են հայտնվել այն բոլոր արվեստի գործերը (նկար, լուսանկար, քանդակ, ինստալյացիա, վիդեո, անիմացիա և այլն), որոնց ներկայացման համար կիրառվող հիմնական մասը թվային տեխնոլոգիաներն են: Թվային արվեստի առաջին կիրառությունը 1980-ականներին էր, երբ համակարգչային մասնագետները մշակեցին AARON նկարչական մեքենան, որը նախատեսված է հատակին տեղադրված թղթի վրա մեծ նկարներ պատրաստելու համար: Մեր օրերում թվային արվեստը դարձել է ինտերակտիվ՝ մարդկանց հնարավորություն ընձեռելով ազդել վերջնական պատկերի վրա:

Նոր մեդիա արվեստում կա նաև մեկ այլ կատեգորիա, որն անվանում են Multimedia art  / Մուլտիմեդիա արվեստ: Այս տերմինն առաջին անգամ օգագործվել է 1960-ականներին՝ երաժշտության, կատարման, ֆիլմի և լուսավորության համակցությունը նկարագրելու համար: Այսօր մուլտիմեդիա արվեստ ասելով` մարդիկ հասկանում են այն արվեստի գործերը, որոնց ստեղծման համար նոր մեդիայի մի քանի տեսակներ միաժամանակ օգտագործվել են մեկ տեղում:

Հեղինակ՝ Հռիփսիմե Հայրապետյան, Վ. Բրյուսովի անվան պետական լեզվահասարակագիտական համալսարանի 4-րդ կուրսի ուսանող

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։