HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սեդա Ղուկասյան

Գրավատների և փոխանակման կետերի պետական տուրքն առաջարկվում է բարձրացնել 60 անգամ. տնտեսվարողները քննարկում ունեցան ԱԺ տնտեսական հարցերի հանձնաժողովում

ԱԺ տնտեսական հարցերի մշտական հանձնաժողովն այսօր նախաձեռնել է աշխատանքային քննարկում «Պետական տուրքի մասին» օրենքում առաջարկվող փոփոխությունների վերաբերյալ, որը վերաբերում է գրավատների և փոխանակման կետերի պետական տուրքի փոփոխություններին։

«Քննարկումն աշխատանքային է, ուղղակի ուզում ենք լսել կարծիքներ այս փոփոխությունների վերաբերյալ, հիմնականում փոփոխություններից դժգոհում են գրավատները և փոխանակման կետերը»,- ասաց հանձնաժողովի անդամ, «Իմ քայլը» խմբակցության պատգամավոր Հայկ Գևորգյանը։

«Որպես սկիզբ ասեմ, որ առաջարկվող փոփոխություններով վարկային կազմակերպություններից գանձվող պետական տուրքը 500 հազարից առաջարկվում է դարձնել 3 միլիոն դրամ, վճարահաշվարկային ընկերություններից գանձվող տուրքը 250 հազարից՝ մեկ միլիոն դրամ, վարկային բյուրոներից՝ 500 հազարից՝ 1 միլիոն դրամ, բանկերից՝ 3 միլիոն դրամից՝ 7 միլիոն դրամ, գրավատներից՝ 100 հազար դրամից՝ 6 միլիոն դրամ, փոխանակման կետերից՝ 50 հազար դրամից՝ 3 միլիոն դրամ, փոխանակման դիլերներից՝ 100 հազարից՝ 3 միլիոն դրամ։ Մենք նամակ ունենք, որի տակ ստորագրել են բազմաթիվ տնտեսվարող սուբյեկտներ»,- ասաց Գևորգյանը։

Հանդիպմանը ներկա են առաջարկվող փոփոխություններից դժգոհող տնտեսվարողներ։ Գրավատան ներկայացուցիչ Աշոտ Մխեյանը ներկայացրեց մտահոգություններն առաջարկվող փոփոխությունների վերաբերյալ.

«Մեր գրավատան պորտֆելը համարվում է փոքր պորտֆել՝ առավելագույնը 20 միլիոն է, և ուղղակի աբսուրդային է, որ մենք կարողանանք 6 միլիոն վճարել լիցենզիայի համար, որովհետև եթե ամբողջ տարին էլ աշխատենք հենց 20 միլիոն պորտֆելով, ու աշխատի ջրի նման, իսկ դա անհնար է, քանի որ մերը մարզում է, էնտեղ վարկային գումարները ավելի փոքր են, չվճարողներն էլ են ավելի շատ»,- ասաց տնտեսվարողը։

Մեկ այլ տնտեսվարող էլ համոզմունք հայտնեց, որ փոխանակման կետերի պետական տուրքը 60 անգամ բարձրանալուց հետո չեն կարող համարժեք մրցակցել բանկերի հետ։

«Թվերով խոսեմ՝ բանկի մասնաճյուղն ունի 15-ից ավելի գործառույթներ և բոլորից եկամուտ է ստանում, իր պետական տուրքը սահմանվել է 350 հազար դրամ, նախկինում բանկի մասնաճյուղը պետական տուրք չէր վճարում, փոխանակման տուրքը տարեկան վճարում էր 50 հազար դրամ, նոր նախագծով՝ մասնաճյուղին սահմանվել է 350 հազար դրամ, բանկի կողքը աշխատող փոխանակման կետը, որը միայն մի գործառույթն է իրականացնում, հավասար մրցակցություն չի լինում, բանկի մասնաճյուղը պետք է վճարի 350 հազար դրամ, փոխանակման կետը՝ 3 միլիոն դրամ։ Կարծում ենք, որ սա ոչ համաչափ է, միգուցե հնարավոր է ելքեր գտնենք՝ ինչ չափի բարձրանա փոխանակման կետերի պետական տուրքը, բայց մինչ օրս Կենտրոնական բանկը կամ Կառավարությունը մեզ հետ երկխոսության չի մտել»,- ասաց նա։

Գրավատնային գործունեություն իրականացնող Մհեր Գևորգյանը նկատեց՝ առաջարկվող փոփոխությամբ պետական տուրքի բարձրացումը համաչափ չէ։

«Անհասկանալի է դառնում, թե այդ ծառայությունների ինքնարժեքներն ինչքան են թանկացել, որ փոքր ընկերությունների համար սահմանվել է 60 անգամ ավելի: Մեր համոզմամբ՝ նման բարձրացում անելուց առաջ պետք էր հաշվարկներ անել, ուսումնասիրել շուկան, իսկ ուսումնասիրությունները ցույց են տալիս, որ գրավատներն ու փոխանակման կետերը ֆինանսական բնագավառում կազմում են ամբողջ համակարգի կես տոկոսից քիչ մասը»,-ասաց Գևորգյանը։

Վերջինիս համոզմամբ՝ որևէ օբյեկտիվ պատճառաբանություն չի եղել, թե նման բարձրացումն ինչով է պայմանավորված։

«Եղել են անհեթեթ պատճառաբանություններ, օրինակ հեռախոս վերցնել, տանել գրավ դնել, տանել էդ փողը խաղալ, կրվել, դառնալ նպաստառու, բայց ինչ կապ ունի դա գրավատան գործունեության հետ, ուրիշ լուրջ պատճառաբանություն չենք ստացել»,- ասաց նա։

«Իմ քայլը» խմբակցության պատգամավոր Արտակ Մանուկյանը նկատեց՝ պետք չէ բանկերի հետ համեմատություն կատարել, այն սկզբունքորեն սխալ է.

«Ես բանկերի շահերը չեմ ներկայացնում, բայց որ իրենք էլ այստեղ լինեին կասեին կանոնադրական կապիտալ, գումարս եմ սառեցնում և այլն, էդ դաշտից խնդրում եմ զերծ մնանք։ Պետական տուրքի վերջին փոփոխությունը եղել է 1997 թվականին: Ճիշտ նշեցիք պարտադիր վճարի մասին, պարտադիր վճարի մի մասը՝ աշխատավարձը մոնոտոն աճում է, ծառայության ինքնարժեքը բարձրանում է, սա հասականալի է, որ հիմնավորում է բարձրացում լինի, ինչ չափով, որքան, ակնհայտ է, որ խնդիր կա»,- ասաց նա։

Հանձնաժողովի նախագահի տեղակալ Հայկ Գևորգյանը, ամփոփելով հանդիպումը, վստահեցրեց, որ տնտեսվարողների դժգոհությունները կփոխանցեն Ֆինանսների նախարարությանը և հնարավորության դեպքում՝ Կենտրոնական բանկին՝ հնարավորինս ընդունելի տարբերակներ ընդունելու համար։

Նշենք, որ Ազգային ժողովի տնտեսական հարցերի մշտական հանձնաժողովում քննարկմանը զուգահեռ՝ գրավատների և փոխանակման կետերի ներկայացուցիչները բողոքի ակցիա են անում Կառավարության շենքի դիմաց՝ պահանջելով հանդիպում վարչապետ Նիկոլ Փաշինյանի հետ:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter