«Իմ քայլը» խմբակցության պատգամավոր Սոֆիա Հովսեփյանը ԱԺ հայտարարությունների ժամին խոսեց իրեն հղված դիմումների մասին, որոնք, իր խոսքով, մեծ մասամբ նույն ոլորտից են։

«Ստիպված եմ լինում բողոքներից մեկը հրապարակել, որը վերաբերում է ՊԵԿ-ում մրցույթներին, որը անցկացվում է, կարծես թե, նորմավորված ձևով, սակայն նշանակումները լինում են ծանոթ-բարեկամի միջոցով»,- ասաց պատգամավորը։

Սոֆիա Հովսեփյանն ասաց, որ ստիպված է իրեն հղված նամակը հրապարակել՝ խնդրին ուշադրություն գրավելու համար։

«Արմեն Հակոբյան, որը Շիրակի մարզում հայտնի է որպես օպերի Արմեն, ով եղել է հարկայինում նախկին աշխատող, աշխատանքի ընթացքում ձեռք է բերել մեծ բիզնեսներ, աշխատանքի ընթացքում իրեն ճանաչել են որպես հարկայինի աշխատող, որը հարկերից խուսափել է, և այդ մարդը նորից Շիրակի մարզում օպերի պետ է նշանակվել, և նա Դավիթ Անանյանի համակուրսեցին է»,- ասաց Հովսեփյանը։

Պատգամավորը հայտնեց, որ պարզաբանումներ ստանալու համար գրավոր դիմել է ՊԵԿ, սակայն այն «լոլոները», որ ՊԵԿ-ից են պատասխանել, իրեն չեն բավարարում։ Պատգամավորը, խոսքը հղելով ՊԵԿ նախագահին, ասաց, որ եթե վերջինս մտածում է, որ այդ պաշտոնում վստահելի մարդու է նշանակել, ապա այդպես չէ, քանի որ Հակոբյանը տարբեր պաշտոններում նշանակում է ոչ թե մրցույթներում հաղթածներին, այլ նրանց, ում ինքն է համարում վստահելի։

«Արդյունքում ունենք մի վիճակ, որ մրցույթներում հաղթում են անձինք, ովքեր չեն նշանակվում այդ պաշտոններում, այլ նշանակվում են, ով այդ մարդու դաբրոյով է հայտնվել այդտեղ»,- ասաց Սոֆիա Հովսեփյանը՝ կոչ անելով ՊԵԿ նախագահին ուշադրություն դարձնել ՊԵԿ-ի Շիրակի մարզի կառույցին։