Ազգային ժողովի փոխխոսնակ Ալեն Սիմոնյանը ԱԺ-կառավարություն հարցուպատասխանի ժամանակ անդրադարձավ զինծառայողների ապահովագրության հիմնադրամին՝ խնդրելով ներկայացնել վերջին շրջանում տեղի ուենցող փոփոխությունները։

Հարցին արձագանքեց վարչապետ Նիկոլ Փաշինյանը՝ հիշեցնելով, որ հիմնադրամի ստեղծման ժամանակ շահառու էին համարվում միայն 2017-ի հունվարի 1-ին և դրանից հետո մարտական հերթապահության ընթացքում զոհված զինծառայողների ընտանիքներն ու առաջին և երկրորդ կարգի հաշմանդամության կարգ ստացած զինծառայողները։

«Հեղափոխությունից հետո մենք ձեռնամուխ եղանք, որ համակարգը երկու տարով հետ գնա ու տարածվի մինչև 2015-ի դեպքերի վրա: Նաև մի քանի օր առաջ հիմնադրամի հոգաբարձուների խորհրդի նիստ է արվել և որոշում կայացվել, որ այդ համակարգը պետք է գնա մինչ 2008-ի հունվարի մեկը ներառյալ։ Իսկ դա նշանակում է, որ 2008-ի հունվարի մեկից ներառյալ և դրանից հետո մարտական հերթապահության պայմաններում զոհված զինծառայողների ընտանիքների անդամները և առաջին ու երկրորդ կարգի հաշմանդամության կարգ ստացած զինծառայողները կստանան ամենամսյա աջակցություն, որը բավական շոշափելի աջակցություն է»,- ասաց վարչապետը։

Փաշինյանի խոսքով՝ նպատակ ունեն հիմնադրամի գործունեությունը հասցնել մինչև ազատագրական պայքարի առաջին օրերը.

«Սրա համար միջոցներ պետք է գեներացնենք»,- ասաց Փաշինյանը՝ հույս հայտնելով, որ քաղաքացիները կշարունակեն հիմնադրամին ակտիվորեն վճարումներն անել՝ տեսնելով, որ շահառուների շրջանակն ընդլայնվում է։