«Լուսավոր Հայաստան» խմբակցության պատգամավոր Սրբուհի Գրիգորյանը անդրադարձավ գյուղատնտեսության ոլորտի խնդիրներին, ասաց, որ Սյունիքի մի շարք համայնքներում բնակիչների հետ հանդիպումներ է ունեցել և պարզել, որ գրեթե բոլորում ոռոգման ջրի խնդիր կա։

«Բռնակոթում 2018-ին սեզոնի կեսից դադարեցվել է ոռոգման ջրամատակարարումը, և սպասվելիք բանջարաբոստանային մշակաբույսերի բերքի 80 տոկոսը փչացել է»,- ասաց պատգամավորը։ Գրիգորյանը խոսեց նաև ջրօգտագործողների միության աշխատակիցների աշխատավարձերի մասին՝ ասելով, որ վերջիններս նախորդ տարվա ապրիլից աշխատավարձ չեն ստացել.

«Այսինքն մինչև աշխատավարձ չստանան, նրանք բոյկոտում են նախապատրաստվել ոռոգման սեզոնին»,- ասաց Սրբուհի Գրիգորյանը։

Վարչապետ Նիկոլ Փաշինյանն արձագանքեց, որ ջրօգտագործողների միության աշխատավարձերը գոյանում են իրենց հավաքագրումների հիման վրա:

«Կա ջրօգտագործող, որն իր համար ստեղծել է միություն, ընտրել է միության նախագահ, ջուր օգտագործողը ջրի համար վարձը վճարում է, միությունը վարձը հավաքագրում է, և ինքը ստանում է աշխատավարձ։ Ի՞նչ է նշանանում՝ բոյկոտում են… Ես երեկ տեսա վերնագիր, որ մի շարք ջրօգտագործող միությունների դեմ քրեական գործ է հարուցվել մի միլիարդ դրամի արհեստական պարտք կուտակելու համար։ Ես չեմ հասկանում՝ ամեն մեկն իր արած-չարածը, իր գողացածը պետք է գցի կառավարության վրա, ցույց անի, որ աշխատավարձ չե՞նք ստացել։ Չեք աշխատել, չեք ստացել»,- ասաց Փաշինյանը։

Փաշինայնի խոսքով՝ կառավարությունը դեռ այդ ոլորտում ստուգումներ կիրականացնի և կպարզի, թե ով ինչքան է գողացել։

«Հետո չգաք ասեք, թե ջրօգտագործողների միություններին լցնում եք բանտերը: Էս ինչ սովորություն է. նստեն իրենց տեղը, գողանան, թալանեն, ուտեն, վերջում ասեն՝ աշխատավարձ չենք ստացել կառավարություն, դե վճարի, ինչի՞ պետք է վճարի կառավարությունը»,- ասաց Փաշինյանը։

Վերջինս անդրադարձավ նաև ոռոգման ջրի խնդրին՝ հիշեցնելով, որ նախորդ տարվանից կառավարությունը մտադիր է եղել 10 միլիարդ դրամ հատկացնել սուբվենցիոն ծրագրերի համար:

«Անցած տարի մենք 10 միլիարդ հատկացրել ենք, բայց դրանից 1,6 միլիարդ դրամն ենք կարողացել ծախսել, որովհետև համայնքներն ի վիճակի չեն, կարողություն չունեն, որպեսզի այդ ծրագրերն իրականացնեն: Մի տեղ մասնագիտական համապատասխան կարողություն չկա, մի տեղ չեն կարողանում ճիշտ կառավարել համայնքը, չեն կարողանում բյուջեի միջոցները հավաքագրել»,- ասաց կառավարության ղեկավարը։