Քննչական կոմիտեում տեղի է ունեցել քննարկում՝ Ամուլսարի հանքի շահագործման նպատակով նշանակված համալիր փորձաքննության շուրջ
2019թ. մարտի 28-ին քննչական կոմիտեում տեղի է ունեցել հանդիպում, որին ներկա են գտնվել քննչական կոմիտեի հատկապես կարևոր գործերի քննության գլխավոր վարչության պետ Սամվել Ավետիսյանը, ՔԿ դեպարտամենտի ղեկավար Արամ Նիկոյանը, ՀԿԳ Կոռուպցիոն, սեփականության դեմ ուղղված հանցագործությունների և կիբեռհանցագործությունների քննության վարչության պետ Յուրա Իվանյանը, քրեական գործով ներգրավված փորձագետներ, բնապահպանության նախարարության, գիտությունների ակադեմիայի ներկայացուցիչներ և ոլորտի այլ մասնագետներ: Այս մասին տեղեկացնում է քննչական կոմիտեն։
«ԷԼԱՐԴ» ընկերության փորձագիտական խմբի համակարգող Ռիկարդո Խուրին, ըստ հաղորդագրության, ներկայացրել է փորձաքննությանը ներգրավված փորձագետների թիմի անդամներին, ովքեր էկոլոգիական քիմիայի,երկրաբանական քիմիայի, երկրաբանական գիտությունների, բնապահպանության և փորձաքննությանն առնչվող այլ ոլորտներում երկարամյա փորձ ունեցող մասնագետներ են:
Հանդիպման ընթացքում «ԷԼԱՐԴ» ընկերության փորձագիտական խմբի համակարգող Ռիկարդո Խուրին ներկայացրել է Ամուլսարի ոսկեբեր քվարցիտային հանքի շահագործման և հետշահագործման ընթացքում շրջակա միջավայրի վրա վնասակար ազդեցության ռիսկերի գնահատման և կարևորագույն այլ հարցերի պարզաբանման նպատակով նշանակված փորձաքննության իրականացման ուղղությունները, մեթոդաբանությունը, հետազոտման բնագավառները, ինչպես նաև՝ ընթացիկ և վերջնական հաշվետվությունների ներկայացման ժամկետները:
Բացի այդ, քննարկումներ են իրականացվել նաև վարույթն իրականացնող մարմնի, քրեական գործով ներգրավված տեղական փորձագետների, ՀՀ բնապահպանության նախարարության, ՀՀ գիտությունների ակադեմիայի ներկայացուցիչների և ոլորտի այլ մասնագետների միջև:
Մեկնաբանել