HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Ռիգայի ռուս քաղաքապետին պաշտոնանկ են արել կոռուպցիոն սկանդալի պատճառով

Լատվիայի շրջակա միջավայրի և տարածքային զարգացման նախարար Յուրիս Պուցեի որոշմամբ՝ պաշտոնանկ է արվել մայրաքաղաք Ռիգայի ազգությամբ ռուս քաղաքապետ Նիլ Ուշակովը: Պաշտոնանկությունը կապված է Rīgas Satiksme տրանսպորտային ընկերությունում խոշոր կոռուպցիոն սկանդալի հետ: Միևնույն ժամանակ Ուշակովը պահպանել է տեղը ավագանու կազմում:

Rīgas Satiksme ընկերության գլխավոր բաժնետերը Ռիգայի քաղաքային իշխանությունն է: Ընկերությունն ու նրա ենթակառուցվածքները պատասխանատու են մայրաքաղաքի ամբողջ տրանսպորտային համակարգի համար: BBC-ի ռուսական ծառայության փոխանցմամբ՝ Նիլ Ուշակովի պաշտոնանկության հիմնական պատճառը նրա կողմից թույլ տրված խախտումներն են: Այս գործում նա հանդիսանում է՝ որպես Rīgas Satiksme-ի սեփականատիրոջ ներկայացուցիչ:

Ավտոբուսների, տրոլեյբուսների և տրամվայների գնման գործընթացում հնարավոր խախտումների վերաբերյալ քննությունը սկսվել էր 2018թ. նոյեմբերին: Կասկածելի գործարքների ընդհանուր արժեքը հասնում է 270 միլիոն եվրոյի: Դա Ռիգայի տարեկան բյուջեի 1/4 մասն է կազմում:

2018-ի դեկտեմբերին Լատվիայի կոռուպցիայի դեմ պայքարի և կանխարգելման բյուրոն 30 խուզարկություն է կատարել և ձերբակալել 7 մարդու: Նրանց թվում եղել են գործարարներ և Rīgas Satiksme ընկերության ներկայացուցիչներ, այդ թվում՝ ընկերության նախկին ղեկավար Լեոն Բեմհենսը:

Հետաքննությունն անցկացվում է Լեհաստանի հակակոռուպցիոն գերատեսչության հետ համագործակցությամբ, որն իր հերթին հաղորդել էր, թե այս գործում հնարավոր կածառքի չափը 800 հազար եվրո է եղել: Լեհաստանում երկու մարդ ձերբակալվել էր, ապա կալանավորվել:

Ավտոբուսներ, տրոլեյբուսներ և տրամվայներ արտադրող լեհական Solaris ընկերությունը հայտարարել է, որ համագործակցում է քննության հետ: Գործում ներգրավված է նաև չեխական Škoda ընկերությունը, որի ներկայացուցիչը կասկածյալների թվում է:

Ռիգայի փոխքաղաքապետ Անդրիս Ամերիկսը ինքնակամ հրաժարական է տվել իր աշխատաեսնյակում կատարված խուզարկությունից հետո: Ռիգայի քաղաքապետարանում նա աշխատում էր 18 տարի:

BBC-ի հաղորդմամբ՝ խուզարկություններ են կատարվել նաև Նիլ Ուշակովի աշխատասենյակում և նրա տանը: Նա չէր ցանկացել ինքնակամ հրաժարական տալ: Ռիգայի ավագանու ընդդիմադիրները վստահ են, որ հենց Ուշակովն է կրում կատարվածի ամբողջ պատասխանատվությունը, քանի որ քաղաքապետն է հանդիսանում տարածքային ձեռնարկության փաստացի սեփականատերը:

Հարկ է ընդգծել, որ Ուշակովին կոռուպցիոն գործարքներում չեն մեղադրում, այլ քաղաքապետի պաշտոնում պարտականությունների կատարման թերացման և խախտումների համար:

Ընդդիմադիր պատգամավորները երեք անգամ արտահերթ նիստ են հրավիրել՝ Ուշակովի հրաժարականի պահանջով, սակայն ամեն անգամ վերջինս մեծամասնության վստահությունն էր ստանում: Ուշակովի կողմնակիցները նույնիսկ ակցիա են անցկացրել Ռիգայում, որին մասնակցել է մի քանի հազար մարդ:

Լատվիայի կառավարությունը հրաժարվել է արձակել Ռիգայի ավագանին, քանի որ նոր քաղաքային խորհուրդը չի կարող պատասխանատվություն կրել նախկինների գործունեության համար, իսկ վերջին կասկածելի գործարքը կատարվել է վերջին ընտրությունների մեկ տարի առաջ:

Քաղաքային իշխանության հերթական ընտրությունները Ռիգայում տեղի կունենան 2021 թվականին, առայժմ հայտնի չէ, թե մինչը այդ ով է զբաղեցնեու քաղաքապետի պաշտոնը:

Նիլ Ուշակովը Ռիգայի ավագանին ղեկավարում էր 2009 թվականից: 2010-ից նա հանդիսանում է «Համաձայնություն» կուսակցության համանախագահը: «Համձայնությունը» Լատվիայի ամենահայտնի կուսակցությունն է, որի օգտին ավանդաբար քվեարկում է ռուսախոս բնակչությունը:

Կուսակցության երկրորդ համանախագահ Յանիս Ուրբանովիչը կարծում է, որ Ուշակովի դեմ քաղաքական պատերազմ է վարվում, որը հրահրել է  «Ազգային միություն» ազգայնական կուսակցությունը:

Ուշակովը նախապես խոստացել է, որ դատարանում վիճարկելու է իր պաշտոնանկության որոշումը: Նրա խոսքերով՝  շրջակա միջավայրի և տարածքային զարգացման նախարար Յուրիս Պուցեն չի կարող ապացուցել, որ այդ որոշումը իրավական է եղել, և ոչ թե քաղաքական: Ըստ Նիլ Ուշակովի՝ Պուցեն զբաղվում է մոլախաղերի բիզնեսի լոբբինգով:

Լուսանկարը՝ Артем Геодакян/ТАСС

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։